Shillong, Ïaïong 07
U Myntri Rangbah ka Jylla, u Conrad K. Sangma ha ka Sngi Ba-ar u la ai khublei kitbok-kitrwiang ïa ki khynnah pule kiba la seisoh ha ka eksamin SSLC, da kaba ai jingïaroh ïa kito kiba wan shakhmat ne ki ‘Topper’ halor ka jinglah jong ki ban poi sha ka thong.
Ha ka jingthoh ha ‘X’, u Conrad u la ong, “Ka jingai khublei ïa ki khynnah pule baieid jong ngi kiba la ‘pass’ ïa ki eksamin #SSLC jong ki. Ka jingai khublei kumjuh ïa ki ‘Topper’ kiba la pynlong ïa ki kmie ki kpa, ki nonghikai bad ki skul jong ki ban sngew sarong! Ka jingkitbok-kitrwiang ïa phi iwei-pa-iwei na bynta ka lawei ba phyrnai. Ai ba phin ïai tyngshaiñ barabor!”
Mynta u snem, ki don 48,623 ngut ki khynnah pule na 719 tylli ki shlem pule ha kylleng ki 171 tylli ki jaka thoh eksamin ne ‘Centre’ kiba la ïakhun ïa ka eksamin SSLC, ha kaba 42,228 ngut ki khynnah pule ki la seisoh ha kane ka eksamin.
