Shillong, Ïaïong 07
U Bah Lahkmen Rymbui uba dei u Myntri ka tnad Pule Puthi u la pynpaw ka jingbynñiaw halor ka jingïabeh ban wan sha sor na ka bynta ki jingpule kiba shajrong (higher studies) watla ki la don ki stream ha ki college kiba don marjan bad ki.
Haba kren bad ki lad pathai khubor ha ka sngi Ba-ar, u Myntri u la ong, “Kane ka dei kaba pynduh mynsiem ïa ngi kum ka Sorkar Jylla.”
U Myntri u la kyntu ïa ki khynnah skul ba kin pyndonkam ïa ki college ba don marjan bad ki, haba ai nuksa kum ïa ka Khraw Sing College ha Mawphlang, Patharkhmah bad Nongtalang.
“Ngi la kynshew pisa, kumta, sngewbha pyndonkam ïa kine ki jaka pule na ka bynta ki jingpule jong phi,” u la ong bad ban jur ruh ba ki jingkynshew ha ka pule dangle ka dei kaba wan na ka pla tyngka ka Sorkar, ym ka song pisa shimet.
“Shisien ba ngi kynshew pisa, kam dei satia na ka pla u Bah Lahkmen, ka dei na ka pla tyngka ka Jylla,” u la ong haba maham ba ka jingkiar ïa ki college ba marjan ka lah ban lam sha ka jingtheh ïa ka pisa tyngka tang ha ki katto katne ki jaka sor.
