Shillong, Ïaiong 07
U Nathaneal Mantre Laloo uba la ïoh ïa ka kyrdan kaba 4 ha ka eksamin Secondary School Leaving Certi-ficate (SSLC) na Seven Set Higher Secondary School, Shillong u la ban jur ban nang ban pyndonkam ïa ka internet.
“Ka pyrthei internet ka long kaba ma bha ïa ki samla, ka shong ha ngi kumno ban pyndonkam,” la ong u Nathaneal.
U la ïathuh ba u la pyndonkam ïa ka internet na ka bynta ban ïoh jinghikai, ban peit ïa ki khubor bad katkum ka juk stad mynta ban ïoh jingtip bad pynkhreh ïalade na ka bynta ka lawei kaba shakhmat.
U la ai jingmut ïa ki khynnah ban husiar bha khnang ban nym kyrni ha ka internet.
U la kyntu ruh ba ym dei ban pyndonkam ïa ka Instagram ha kane ka rta, hynrei baroh ka shong ha ka rukom pyndonkam bad pynlong ïa ka kum ka atiar ban hikai, ym kum ka jingpynthut.
Haba phai ha ka jingpynkhreh ïa ki eksamin SSLC, u Nathaneal u la ai jingmut, haba khreh kot, pule haba sngew kwah hynrei dei ban shimkhia. “Pynkmen ïalade haba phi don ha skul jong phi bad leh ïa kaei kaba phi ieit ,” u la ong.
Shuh shuh u Nathaneal u la pynpaw ba ka jingthmu jong u ha ka lawei ka long ban bteng ïa ka kam khaïi bad ban long u Charter Accountant, ban ïarap ïa ki riewlum kiba dei ki trai jylla.
Katba ka Prajukta Roy kaba la ïoh ïa ka kyrdan kaba lai ha ka eksamin Secondary School Leaving Certificate (SSLC) na Seven Set HSS Shillong ka la ban jur halor ka jingdonkam ban pyndonkam ïa ka internet .
Haba kylli shaphang ki jingkhmih lynti, ka Prajukta ka la ai khublei ïa ki nonghikai, ki kmie ki kpa kiba la ai mynsiem hynrei dei ruh ka jingaiti lut ïalade.
Katba ka Katherine Amy Nongbet kaba wan ha kyrdan kaba 16 na Seven Set HSS ka la pynpaw ba ka ju duwai man ka sngi haba ka khreh kot.
Ka la pynpaw haba pyndonkam ïa ka social media dei ban pynleit jingmut ban khreh kot bad dei ban kiar ruh ïa ka jingïadei paralok khnang ban poi sha ka thong.
