Shillong, Ïaïong 07
Ka Meghalaya Football Association (MFA) ka la pyllait ïa ki kyrteng ki rangïalehkai kiba la ïoh jingmynjur na ka bynta ban leit ïasoh noh sha kiwei pat ki klob kiba don ha ki district bapher jong ka Jylla na ka bynta u snem 2026.
Ki la don haduh 278 ngut ki rangïalehkai kiba la aplai bad kiba la lah ban pyndep pura ïa baroh ki jingdonkam. Ka jingdon ki rangïalehkai mynta u snem kiba kynriah ïalehkai noh sha kiwei ki district ki long kiba duna bha namar ha u snem 2025 ki la don haduh 329 ngut, katba ha u 2024 ki la don 122 ngut.
Ïa kane ka jingkynriah ïalehkai la pynkut noh ha ka 31 tarik u Lber.
Kumba ka paw ki la don haduh 80 ngut ki rangïalehkai na kiwei pat ki district kiba la pynïasoh sha ki kynhun ïalehkai jong ka Shillong Sports Association. Ha ka ïew kyntiap klob ki la don 56 ngut ki rangïalehkai ki ban ïalehkai noh ha ka lympung ïalehkai jong ka Thadlaskeiñ Sports Association bad 42 ngut sha ka East Jaiñtia Hills District Football Association.
Ki klob kin sa soi ïa ki rangïalehkai ha ka ïew kyntiap klob ban pynkhlaiñ ïa ki kynhun ïalehkai hashwa ba ki synjuk ïalehkai jong ki district kin pynlong ïa ki lympung ïalehkai jong ki na ka bynta u snem 2026 bad hashwa ban sdang ïa ka 5th Meghalaya State League ban pynlong da ka MFA na ka bynta ki klob kiba don ha ka kyrdan ba hakhlieh ha ka Jylla, ka ban sdang ha kaba kut jong mynta u bnai.
Haba pynpaw halor kane ka jingmynjur jong ka jingkynriah klob, u General Secretary ka MFA u Bah Sunesh Syiem u la pynkynmaw ïa baroh ki synjuk ïalehkai ym lah ba uwei u rangïalehkai u ban ïalehkai palat ïa kawei ka district sports association ha ka shi aïom. “Sngewbha kynmaw ba lada lap ba don kino kino ki rangïalehkai kiba pynkheiñ ïa ki kyndon, u rangïalehkai bad kumjuh ruh ka synjuk ïalehkai kin gat ha ka jingshah pynshitom ha ka MFA,” u la bynrap.
