Tehran, Iaiong:
Ka tnat ïada jong ka Iran, ha kane ka kynti ka la pynti ba u Majid Khademi, u heh jong ka tnat syntiat ka Iran, u la khlad noh hapdeng ka jingleit thombor jong ka US bad Israel. Hynrei katei ka tnat ïada jong ka Iran, kam shym la iathuh shai pat ha kano ka rukom bad ka jaka ba ka US bad Israel ki la leit thombor bad shim ia ka jingim jong utei u heh hynrei la ong ba ka US bad Israel, ki la leit thombor sha kylleng ki bynta jong ka nongbah ba pdeng eh jong ka Iran, ha Tehran ha ka Sngi Nyngkong.
“U Major General Majid Khademi, uba dei u heh ba donbor bad ba la shemphang bha jong ka tnat syntiat jong ka Islamic Revolutionary Guard Corps (IRGC), u la shah pyniap ha ka jingshah thombor jong ki nongshun jong ka America bad Zion… ha ka por mynstep,” la iathuh ka kyrwoh na ka tnat ïada jong ka Iran.
U Khademi u la shimti ia ka kam na ka bynta u General Mohammad Kazemi, ia uba ki Israel ki la pyniap ha ka thma kaba 12 sngi ha u bnai Jylliew.
Katkum ka jingpynbna, u Khademi u la buh jingthoh “ki jingnoh synniang kiba kongsan, kiba neh, bad kiba ai jinghikai ha jan shiteng spah snem jong ka jingsumar kaba shisha bad kaba shlur ia ka jingkylla, ka rukom synshar, bad ka ri Islam ha ki liang jong ka jingstad bad jingshngain.”
Ka IRGC ka la kdew ba ki jingpyrshang jong u ki lah ban long kum ka jingshai ba ïalam ïa ki riewstad jong ka ri ha ki snem kiba bun ban wan, khamtam haba “ïakhun pyrshah ïa ki nongshun bar ri ha ki kyrdan ba kongsan.”
Ka seng wad bniah jong ka Guard ka don ia ka bor kaba khraw ha Iran bad ka jubab tang ia u nongialam ba ha khlieh duh jong ka ri. Bunsien la ju pyniadei bad ka jingshah set jong ki nongshong shnong jong ka ri Sepngi ne kito kiba don jingiadei shabar ri. La kynnoh ruh ba ka la pynlong ïa ki kam pynïap briew bad ki kam thombor shabar ri kiba thmu ïa ki nongpyrshah ïa ka jingsynshar blei jong ka ri.
