Shillong, Ïaïong 07
Ka jingshah tuh jong ki kali arshaka ka la nangjur na kawei ka sngi sha kawei pat nalor kiwei pat ki kam tuh kam thiem kiba dang ïai bteng bad ïa kane lah ban sakhi na ki jingjia shah tuh kiba dang shen na kylleng ki bynta jong ka sor Shillong bad na kiwei ki jaka ruh kumjuh.
Katkum ka khubor na ki pulit la ong u Bah Overson Nongkhlaw u la ai ka jingujor ba ha ka 3 tarik mynta u bnai ha ka por kumba 3.20 mynstep, ki runar bym lah ban ithuh ki la tuh ïa ka arshaka jong u kaba don ïa u registration number ML05-Y-8802 na ka shnong Laitjem ha East Khasi Hills.
Ha kawei pat ka khubor u Bah Rijiedlang Kharsyad u la ai ka jingujor ba ha ka 4 tarik mynta u bnai ha ka por kumba 6.30 janmiet, ki runar bym lah ban ithuh ki la pynpait ïa ka ïit jong ka kali jong u, kaba don ïa u registration number ML05-AA-8554 ha Nongkseh Kynton, Block-7, Upper Shillong bad ban tuh ïa kawei ka laptop, ka pisa T.15,000/- bad kawei ka jacket.
U Ronan Khonglah u la ai ka jingujor ba ha ka 4 tarik mynta u bnai hapdeng ka por 9 mynmiet haduh 11.30 mynmiet, ki runar bym lah ban ithuh ki la tuh ïa ka arshaka jong u kaba don ïa u registration number ML05-X-3959 na ka thaiñ Laitkor, Shillong.
Kumjuh ruh u Bah Banraplang Lyngdoh u la ai ka jingujor ba ha ka 6 tarik mynta u bnai, ba ki runar bym lah ban ithuh ki la tuh ïa ka car tape, woofer bad amplifier na ka kali jong u kaba don ïa u registration number ML05-C-5462, kaba la pynïeng hajan ka jaka jong u ha Lower Nongrim Hills, Shillong.
Ha ka 6 tarik mynta u bnai, ki pulit ki la ïoh pdiang ka jingtip na uwei u briew ba la tip kyrteng kum u M Warshong ba ki runar bym lah ban ithuh ki la tuh ïa ka arshaka jong u kaba don ïa u registration number ML05-X-3959 na ka thaiñ Laitkor, Shillong.
Na ka liang u Shanskhem Marbañiang u la ai ka jingujor ba ha ka 2 tarik mynta u bnai, ha ka por 2.30 mynstep, ki runar bym lah ban ithuh ki la tuh ïa ka arshaka jong u kaba don ïa u registration number ML05-AA-5908 na ka jaka sah ka jong u, ha Pyndengumiong Lummaralong (EWKH).
Na ka liang jong u Joni Kharsyntiew ruh u la ai ka jingujor ba ha ka 2 tarik mynta u bnai, ha ka por kumba 2 baje mynstep, ki runar bym lah ban ithuh ki la tuh ïa ka arshaka jong u kaba don ïa u registration number ML05-AA-9043 na ka jaka sah jong u, kaba don ha Pyndengumiong Dong Umwiehsup (EWKH).
Kumjuh ruh na ka liang jong u Marshall Diengdoh u la ai ka jingujor ba ha ka 2 tarik mynta u bnai, ha ka por kumba 2 baje mynstep, ki runar bym lah ban ithuh ki la tuh ïa ka arshaka jong u kaba don ïa u registration number ML05-AB-5503 na ka jaka sah jong u, kaba don ha Pyndengumiong Lum Ïew (EWKH).
Katba na ka liang jong u Bah Tubastriwell Lyngdoh u la ai ka jingujor ba ha ka miet jong ka 2 tarik mynta u bnai, ki runar bym lah ban ithuh, ki la prong tuh hapoh ka dukan jong u, kaba don ha Domkohlang Pariong (EWKH) bad ban rah tuh ïa ka pisa kaba long T.23,000/-.
