Shillong, Ïaïong 07
U Myntri ka tnad pule-puthi ka Sorkar Jylla, Bah Lahkmen Rymbui u la pynshong nongrim ba ka jingleh bha jong ki khynnah pule ha ka eksamin Secondary School Leaving Certificate (SSLC) mynta u snem ka dei namar ka jingshimkhia jong ka Sorkar ban buh hakhmat eh ïa ka pule-puthi.
“Ki risol ki kren hi dalade, ha kaba tang 6000 ngut ki khynnah pule kim shym la seisoh na ka jingdon jong baroh kiba la ïakhun ïa ka eksamin,” ong u Myntri haba kren sha ki nongthoh khubor ha ka Sngi Ba-ar.
U Bah Rymbui u la kyntu ruh ïa kito ki khynnah pule ki bym shym la seisoh ha kane ka kynti ba kin shim kabu ïa ki eksamin ‘Supplementary’ jong ka SSLC ki ban long ha u bnai Jymmang mynta u snem.
“Ka don beit ka lad kaba ar…nga kitbok-kitrwiang ïa kito ki bym shym la ‘pass’ ban shim ïa kane ka kabu,” u la ong.
Ha kajuh ka por, u la pynpaw halor ka jingdon jong kiba bun jait ki skul bad ki khynnah pule kiba la leh bha, kynthup ïa kito kiba na ki jaka nongkyndong.
“Kane hi ka kren shai shaphang ki jingpyrshang jong ki skul bad ka Sorkar ban kyntiew bad pynbha ïa ka pule-puthi,” la ong u Bah Rymbui.
U Myntri u la ai nam ruh ïa ki sienjam ba la shim da ka Sorkar, kynthup ka jingwanrah ïa ki kot ïarap, na ka bynta ka jingleh bha jong ki khynnah.
“Naduh u snem 2018, ngi la buh hakhmat eh ïa ka pule-puthi, ban pynbeit ïa ki jingeh bad ban pynkylla ïa ka rukom treikam na ka bynta ka jingbha jong ki khynnah pule,” u la ong.
Shuh shuh u Bah Rymbui u la ban jur halor ka jingangnud jong ka Sorkar ban pynbha ïa ka pule-puthi, da kaba ong, “Ngin ïai bteng ban pynbeit ïa ki jingduna, ban pyntikna ba ki khynnah pule jong ngi kin ïoh ïa kaba paka tam.”
