Jowai, Ïaïong 07
Ka Lion Y& S.A ka la long ka lahduh ha ka lympung ïalehkai WJHDCA District Cricket League 2026, hadien ba ka la lah ban pynliem noh ïa ka Goodwill Mupliang S.C da 53 run ha ka jingïakhun final kaba la long ha ka sngi Ba-ar ha Khliehtyrchi Mini Stadium.
Ha kane ka jingïakhun ka Goodwill Mupliang kaba la jop ïa ka jingkynting pisa, ka la ailad ïa ka Lion ban tied nyngkong ha kaba ka la kamai 160 run bad shah pynhap 8 wiket ha ki 25 over. U Firstbornson Dkhar u la tied 43 run bad u Nick Dann u la ïoh 27 run. Na ka liang ka Goodwill Mupliang S.C, u Echwa Phawa bad u Byforcestar Dhar ki la khur mar 3 wiket.
Haba wan beh ïa ka thong, ka Goodwill Mupliang ka la kamai tang 107 run bad ka la shah pynkhyllem baroh ki nongtied ha ki 24.3 over. U Echwa Phawa u la tied 27 run. Katba u Nick Dann u la khur 4 wiket na ka bynta 18 run bad ban khur syndon ïa ka nam Man of the Match.
Ïa ka nam Most Promising Player la khur da u George Branly Tariang jong ka War Jaiñtia United. Best Batsman bad Man of the Tournament jong kane ka lympung ka leit sha u Byforcestar Dhar (340 run bad 6 wiket na ki 6 inning) jong ka Goodwill Mupliang SC uba la ïoh bun ron eh ha kane ka lympung. Ïa ka Nam Best Bowler la ïoh da u Conard Sana (17 wiket na ki 6 inning), u nongkawang bol jong ka The Legend (Lissi Pearl) uba la ïoh ban pynhap bun wiket ha kane ka lympung.
La ïadon lang ha kane ka sngi da u Myntri ka tnat ïalehkai u Bah Wailadmiki Shylla kum u kongsan ha ryngkat u Bah Medling Swer, MDC, Executive Member ka JHADC kum u symbud kongsan kumjuh u Bah Khroobok Passah, Asstt. Director ka tnat ïalehkai nalor u President ka synjuk u Bah Eddy S. Shylla, ki Vice-Presidents, General Secretary bad kiwei kiwei.
Na ka liang u Bah Wailadmiki kum u kongsan u la ai jingïaroh ïa ka synjuk kaba la lah ban pynlong ïa kane ka lympung bad ban kyntiew ïa ki samla ha ka jingïalehkai kriket. U la ai jingïaroh ruh ïa ki kynhun kiba la poi sha ka final khamtam ïa ka kynhun kaba la khur ïa ka jingjop
Shuh shuh u la ai jingmut ruh ïa ka synjuk lada long kaba lah ban pynlong khambun ki lympung ïalehkai ha ka shisnem khnang ba ki samla ba ïeit ïa ka kriket kin kham ïoh lad khambun ban ïoh ïalehkai.
