Shillong, Ïaïong 07
U Myntri ka tnad Pule Puthi Bah Lahkmen Rymbui u la kyntu ïa u Executive Member (EM) ka KHADC bad MDC ka Mawthadraishan Bah Powell Sohkhlet ba un mang pisa na ka skhim MDC lajong ban shna pynbha bad maramot ïa ki ïingskul, haba kyntait ïa ki jingkynnoh ba leh shiliang ha ka jingsam ïa ka song pisa ban maramot ïingskul.
“Ngam thikna mano ba pynmih ïa kane ka jingkynnoh bad ha kano ka nongrim, kumta ngam lah ban jubab ïa ka. Hynrei, naduh u 2018, ngi la buh hakhmat eh ban maramot bad shna pynbha ïa ki ïingskul, kum shibynta na ka ‘mission’ jong ngi ban ai ïa ka pule dangle ba bha tam sha ki khynnah skul. Mynta u snem, ngi la mang ban maramot haduh 186 tylli ki skul, kynthup kito kiba la wanrah ïa ka arts stream ha ki Higher Secondary School,” ong u Bah Lahkmen haba ïakren bad ki lad pathai khubor ha ka sngi Ba-ar, haba jubab ïa ki jingkynnoh u Bah Powell.
U Myntri u la ai jingmut ba u EM ka KHADC Bah Powell Sohkhlet u dei ban pyndonkam ïa la ka skhim MDC na ka bynta ban maramot ïa ki ïingskul haba ong “Kum u MDC, u ruh u don la ka jong ka skhim ban maramot ïingskul. Kumta, u dei ban mang kham bun ka pisa na la ka jong ka skhim”.
U Bah Lahkmen u la ïathuh ïa ka jingpyrshang jong ka Sorkar da kaba ong, “Ngi la mang 186 tylli ki skul hapoh ka Mission-IV, bad kane kan dang bteng. Ngi la pyrshang kat kaba lah, bad ki kam kila nang ïaid”.
U la ban jur ïa ka jingdonkam ban ïatreilang da kaba ong, “Nga kyntu ïa baroh ki kynhun ba don bynta, ban ïasnohkti lang bad ka Sorkar. Ha ka jaka ban shu kynnoh, to ngin ai jingïaroh ruh ïa ki sienjam bala shim da ka Sorkar bad ban ïatreilang na ka bynta ka jingmyntoi ki khynnah skul”.
Ha kawei pat ka liang, u Executive Member (EM) ka KHADC bad MDC ka Mawthadraishan Bah Powell Sohkhlet u la pynpaw ïa ka jingsngewkhia halor ka jingai song pisa ban shna pynbha ïa ki 186 tylli ki ïingskul Lower Primary ka Sorkar ha Jylla, haba kynnoh ba ka don ka jingleh shiliang khmat ha ka jingsam ïa ka pisa.
U Bah Powell haba buh jingkylli ïa ka jingleh shiliang khmat, u la ong, “Ka Sorkar kala mang ïa ka song pisa ban shna pynbha ïa tang 8 tylli ki skul ha Eastern West Khasi Hills District napdeng ki 186 tylli ki skul, katba ka West Garo Hills District ka ïoh haduh 38 tylli ki skul, West Jaiñtia Hills-29, East Khasi Hills-19, East Jaiñtia Hills-9 bad West Khasi Hills-8.”
U la ban jur, “Nga ïaroh ïa ka sienjam ka Sorkar Jylla ban shna pynbha bad maramot ïa ki skul Lower Primary, hynrei ka rukom sam ïa ka bhah pisa ka i kumba leh shiliang. Ka Eastern West Khasi Hills ka don palat 80 tylli ki skul Lower Primary ka Sorkar, ïa kaba bun ki don hapdeng ka jinglong kaba la jot, hynrei watla katta tang 8 tylli kila ïoh ïa ka song pisa”.
U la ai jingmut ban pyndonkam ïa shibynta jong ka song T.125 klur na ka bynta ki skul deficit bad adhoc bad ong “Ki nonghikai ha kine ki skul ki ïoh ïa ka tulop Sorkar, hynrei ïa ka jingmaramot ïa ki ïingskul la ieh ha ki Managing Committee ki skul. Balei bym ai song pisa ïa kane ka kam ruh na ka bynta kine ki skul?”.
U la kyntu ban peitngor, “Nga khot ïa ki Dorbar Shnong bad ki Management Committee ki skul ban pynthikna ba ki kontraktor ki pyntreikam haba shai ïa ka song pisa, ka ban ai jingmyntoi ïa ki khynnah skul”.
