Shillong, Ïaïong 07
Ka para trai jong ka Kong Eilang Phawa, ka la ïathuh ba kum ka ïing ka sem kim shym la don jingtip ei-ei la ka Eilang ka don jingïadei ne-em bad u Kenedy Khongsit uba la shah kem ha ki pulit halor ka jingkynnoh donkti pynïap ïa u heprit Kyrshanbor Kharmudai.
Haba kren sha ki lad pathai khubor ha ka noh phai sngi jong ka 07 tarik u Ïaïong 2026, ha NEIGRIHMS Hospital, ka para jong ka Kong Eilang ka la ïathuh ba ha ka 20 tarik u Lber 2026, ka Eilang ka la mih na ïingsah kaba don ha Nongthymmai Lawjynriew ban leit kai sha ïing ki bahaïing kaba don ha Rynjah RR Colony, hynrei haduh mynmiet ruh kam shym la wan shuh sha ïing.
Ka la ong ruh ba ka Kong Eilang ka la mih na ïing jong ki bahaïing na Rynjah ha ka por 4 baje ei-ei janmiet jong ka 20 tarik u Lber bad kam shym la wan poi pat sha ïing haduh ka sngi kaba bud.
Hadien kata ha ka sngi kaba bud ngi la leit mih sha Thanad Rynjah ban pyntip sha ki pulit ba ka Kong Eilang Phawa ka la jah khlem wan poi ïing shuh, la ong ka para.
Haba kylli ka para ka la ong ba ki don ka jingsuba ba ïa ka Kong Eilang Phawa la shah pynïap ha ki briew, da kaba khmih lynti ba ki pulit kin tohkit bniah ban lap ïa ka jingshisha baroh.
Ka Kong Eilang Phawa ka la mih khatduh na ïing jong ki bahaïing kaba don ha Rynjah RR Colony ha ka por janmiet jong ka 20 tarik u Lber 2026, bad ha ka 06 tarik Ïaïong pat la lap noh ïa ka metïap jong ka kaba la song hapoh ka byrni plastik ha wah khappud jong ka Nongrah Lummarboh bad Rynjah.
“Ngi la ïa wad kylleng-kylleng bad ngi la kylli sha ki bahaïing hasem ba ka Kong Eilang ka don shano hynrei kim shym la tip eiei. Halor ka jingïadei bad u Kenedy ngim tip eiei namar ba ngim ju ïohi ba ka leit shata ne leitkai bad u Kenedy,” la bynrap ka para.
Da kaba pynthikna ruh ba ka Kong Eilang ka don jingduna ha ka bor ïohsngew, bad ka ktien ruh kam da lait bha ban kren bad ki briew.
Na ka liang ki kur haba bynrap kren ki la pynpaw ïa ka jingsngewsih kthang haba ïadei bad kane ka jingjia, namar bunsien ki ju ïohi ïa kane ka jingjia na ka por sha ka por sha kiwei ki longïing halor ka jingjah bad shah pynïap bad mynta ka wan jia kylla ha ka ïing ka sem jong ki kaba la pynsngewsih haduh katta-katta.
Nalorkata ki la bynrap ruh ba halor kane ka jingjia ki la aiti sha ka aiñ bad ka aiñ kan sa leh ïa kaba donkam ban tohkit bniah ban lap ïa ka jingshisha.
