Bhubaneswar, ïaïong:
Arngut ki khynnah shynrang ha ka Ganjam distrik jong ka Odisha, ki la mynsaw ha ka sngi Ba-ar, haba ki la shim bakla ba u bom uba ki la ïalehkai u dei ka bol bad u la bthei ha kawei na ki kti jong uwei u khynnah uba la kham heh.
Kine ki khynnah ki dang ïalehkai hajan ki ïing jong ki haba ki ïohi ïa kata ka tiar kaba long kum ka bol. Khlem da tip ba u dei u bom pynbthei, ki la sdang ban kynting kai mar kylliang. Kynsan kynsan u la bthei ha ka por ba ka don ha ka kti jong u Om Prakash Bhuyan, uba la 14 snem uba la mynsaw jur, katba uwei pat u khynnah uba kham rit u Ganesh Bhuyan uba dang 8 snem ka rta u la shu mynsaw malu mala.
Ïa u Om Prakash Bhuyan la phah noh sha Berhampur Medical College ban ïoh ïa ka jingsumar kaba kham biang.
Ki nongshong shnong ki la pynpaw ïa ka jingkyndit halor katei ka jingjia bad ki la buh jingkylli ïa ka jingdon jong u bom ha katei ka jaka.Ki pulit ki la sdang ïa ka jingtohkit ban lap ïa ka tynrai jong ka jingdon utei u bom bad mano ba iehnoh ïa u ha katei ka jaka.
