Shillong, Ïaïong 07
Ka Kmie jong u Kenedy Khongsit uba la donkti ban pynïap ïa u heprit Kyrshanbor Kharmudai uba dei marjan ïing, ka la pynpaw ïa ka jingsngew-sih kthang mar shu ïoh jingtip ba ïa kane ka kam la leh hi da u khun jong ka.
Haba kren sha ki lad pathai khubor ka Kmie jong u Kenedy ka bym shym kwah ban pyni dur khmat ka la ïathuh ba ha ka por ba jah u heprit Kyrshanbor Kharmudai baroh shi ïing ki ïa leit wad lang ban shem ïa u hynrei kam tip pat ba dei u khun jong ka uba la pynïap ïa u heprit.
“Nga sngewkmen ba ki pulit ki la lap ïa u heprit bad nga sngewsih pat ba dei u khun lajong ba pynïap ïa u, ka la ong.”
Ka la ïathuh ruh ba u Kenedy teng-teng u dom bad teng teng u bha mynsiem hynrei kam tip ba u don ka bynta ban leh ïa ki kam ba sniew haduh ban shim ïa ka jingim u heprit.
Nga ju ïai sneng ïai kraw ïa u ban ïaid ha ka lynti ba hok hynrei ngam lah satia namar ba u dei u briew uba sniew bad dakait.
Nalorkata, ka la ong ruh ba kim tip ha kano ka top um ba u Kenedy u la thep ïa u heprit namar ba ki don lai tylli ki top um ha phyllaw bad ki la dep ban pyndonkam ruh ïa ka um, da kaba ong ruh ba lah ban dei ka top um ba heh kaba don kumba 1 hajar litar ei-ei ba u Kenedy u thep ïa u heprit.
Ha kawei ka liang nga sngewkmen ba la lap ïa u nongpynïap ïa u heprit hynrei nga sngewsih pat ba dei u khun lajong ba leh ïa kane ka kam, la ong shuh shuh ka Kmie.
