Shillong, Ïaïong 07
Ka kynhun ki ‘thei ïalehkai ka Jylla ka la pynliem ïa ka Arunachal Pradesh da ka 6 wiket ha ka Group-B jong ka NECDC U-23 Women’s T20 Tournament ha ka sngi Ba-ar ha Rangpo, Sikkim.
Ka Meghalaya ka la shah rem ha ka lah sngi U Blei ha ka Sikkim da 67 ron bad kumta ka la donkam ban khur ïa ka jingjop mynta ka sngi khnang ban pynkhie im biang ha kane ka jingïaid lynti na ka bynta ban jam sha kawei pat ka wat jingïakhun.
Ka Arunachal kaba la jop ïa ka kynting pisa, ka la kamai tang 99 run bad shah pynhap 7 wiket ha 20 over. Ka kapten kane ka kynhun ka Nabam Yakar ka la tied 21. Katba ka Cheanchi K Sangma ka la khur 3 wiket na ka bynta 14 run ha ki 4 over bad ban khanglad ïa ki nongtied ka Arunachal.
Hynrei ka Monica Singh ka la lah ban ïalehkai bha ha kaba ka la kamai 22 run na ka bynta ka Meghalaya ryngkat ka Suriti Kumari Ray (36 not out) bad ka Jayshree Singh (14) na ka bynta ban kynjoh sha ka thong da kaba kamai 100 run bad shah pynhap 4 wiket ha ki 16.4 over.
Lyngba ka jinglah ban ïalehkai bha ka Cheanchi ka la khur ïa ka nam Player of the Match.
Ha kawei pat ka liang ka kynhun ki rangïalehkai ka Meghalaya kam shym la lah ban ïalehkai bha ha kaba sdang ïa ka NECDC U-19 Men’s One Day Tournament ha kaba ka la shah rem noh ha ka Manipur da 144 run ha Dimapur. Te kumta ka Meghalaya kan pynkhreh ïa ka jingïalehkai kaba ar ha ka Group-A pyrshah ïa ka Nagaland mynta ka sngi Balang.
Ïa kine ki ar tylli ki lympung ïalehkai, la pynlong da ka North East Cricket Development Council (NECDC). Ha u snem ba la lah, la pynlong ïa ka lympung ïalehkai na ka bynta ki nongïalehkai senior, hynrei mynta u snem ka la rai ban pynlong da ar tylli ki lympung ïalehkai U-19 na ka bynta ki shynrang bad ka U-23 na ka bynta ki kynthei khnang ban plie lad ïa ki khynnah kiba dangkhie dangsan ba kin ïoh ban pyni ïa ki sap ïalehkai jong ki.
