Shillong, Ïaïong 07
U Myntri ka tnad pule-puthi, Bah Lahkmen Rymbui ha ka Sngi Ba-ar u la pynshai ba ka rai jong ka Sorkar ban pynkiew ïa ka bai klas ha ki kolej Sorkar ka dei tang ka jingai jingmut, bad la ieh ïa kane ha ka jingstad jong ki kolej.
“Ka Sorkar Megha-laya ka buh hakhmat eh ïa ka bha ka miat jong ki samla pule. Ka baibam ‘Post-Matric’ ka dei na ka bynta ban siew pat ïa ka bai klas, bad ngi la pynkiew ïa ka,” ong u Bah Rymbui haba pynpaw ïa ki jingpyrshang jong ka Sorkar ban kyrshan ïa ki samla pule.
U la jubab ïa ka jingkylli halor ka jingpyrshah ba dang shen halor ka rai ba la kynnoh pynkiew ïa ka bai klas jong ki kolej Sorkar ha ka Jylla.
U Bah Rymbui u la ban jur ruh ba katei ka rai kam dei na bynta baroh bad kan ym ktah ïa ki samla pule ne ki kmie ki kpa.
“Lada ki samla pule bad ki nongshim bynta ki mynjur, to ai kan long kumta. Ïa ka jingpynkiew yn siew hadien ba ki la ïoh ïa ka baibam jong ki. Lada kim ïoh ïa ka baibam, kim donkam ban siew,” u la ong.
U Myntri u la batai ba kane ka sienjam ka thmu ban ai laitluid ïa ki kolej ban pynïaid hi dalade ïa ki kam jong ki.
“Ngi ieh ha ka Managing Committee, Principal, seng ki samla pule, bad ki nonghikai ban rai kaei kaba bha tam na ka bynta ki kolej jong ki,” u la bynrap.
Shuh shuh u Bah Rymbui u la kyntu ïa ki nongshim bynta ba kim dei ban sngewthuh bakla ïa ka jingai jingmut jong ka Sorkar, da kaba ong, “Kane ka pisa kan ym leit sha ka pla tyngka jong ka Sorkar. Kin hap ban pynïaid hi dalade.”
U la pynpaw ïa ka jingbei tyngka jong ka Sorkar ha ka pule-puthi, kynthup ïa ka jingseng jong ki kolej thymmai bad ka skulbah jong ka Jylla.
“Ngi kwah ban ai ïa ka jingpule kaba paka tam, ym tang ha Shillong, hynrei ha baroh kawei ka Jylla,” la ong u Bah Rymbui.
