Shillong, Ïaïong 07
Ka Langsning XI CC ka la lah ban pynthikna ryngkat bad ka Sputnik CC na ka bynta ban jam sha ka semi final na ka Group-1 ha ka lympung ïalehkai P.A.Sangma Memorial T20 Cricket Tournament 2026, hadien ka la lah ban pynliem noh ïa ka Lok Bhawan da 60 run ha ka sngi Ba-ar.
Ha kane ka jingïakhun Super 8 jong kane ka group kaba la long ha madan Polo, ka Lok Bhawan kaba la jop ïa ka kynting pisa ka la ailad shwa ïa ka Langsning XI ba kan tied nyngkong ha kaba ka la kamai 139 run bad shah pynhap 7 wiket ha ki 15 over. U Ibit Thabah u la tied 34 run na ki 24 bol bad u Bamanbha Shangpliang u la ïoh 22 run na ki 15 bol. Katba u Andrew Ropmay u la khur 3 wiket bad ïa ki 2 wiket la khur da u Asif Khan na ka bynta ka Lok Bhawan.
Ka Lok Bhawan kaba la wan shimti ïa ka pali kaba ar kam shym la lah ban ïalehkai ha kaba ka la kamai tang 79 run bad shah pynkhyllem 9 wiket ha ki 15 over. Kane ka la wan lyngba ka jingïalehkai bha u Riboklang Hynñiewta bad u Enrick Suchiang, kiba la lah ban khur mar 3 wiket na ka bynta ka Langsning. Katba ki nongtied ka Lok Bhawan u Krishna Chettri u la tied 22 run na ki 16 bol bad u Ayushman Das u la ïoh 21 run na ki 22 bol. Ïa ka nam Player of the Match la khur da u Riboklang Hynñiewta.
Lyngba kane ka jingjop ka Langsning ka la ïaryngkat mar 4 poiñ ryngkat ka Sputnik na ka bynta ban bat ïa ka kyrdan ba hakhlieh ha ka Group-1. Katba ka Young Guns (2 poiñ) ka la wan ha ka kyrdan balai bad ka Lok Bhawan ka la wan ba saw hadien na kam shym la lah ban kamai poiñ.
Haba phai sha kawei pat ka jingïakhun jong ka Group-2, ka Rangkynsai CC ka la duh ban bat ïa ka kyrdan ba hakhlieh hadien ba ka la shah rem noh ha ka Royal CC da 3 wiket. Te kumta ka Royal ka la ïoh ban lamkhmat watla ïaryngkat mar 4 poiñ bad ka Rangkynsai.
Ha kane ka jingïakhun ka Rangkynsai kaba la kam trai ban tied nyngkong, ka la kamai 144 run bad shah pynhap 8 wiket ha ki 20 over. U Ajay Duhan u la ïoh ban khyrwit ïa ka shiteng spah kaba 50 run na ki 40 bol bad u Sudhir Sahani u la ïoh 45 run na ki 31 bol. Katba u Sunil Lachit u la khur 2 wiket bad ïa ki 3 wiket la khur da u Swastic Chettri na ka bynta ka Royal.
Hynrei ka Royal ka la lah ban kynjoh sha ka thong hadien ba ka la lah ban kamai 145 run bad shah pynhap 7 wiket ha ki 17.2 over. U Raj Biswa u la tied 43 run na ki 28 bol bad u Rajesh Tati u la ïoh 27 run na ki 20 bol. Katba u Ajay Duhan u la khur 2 wiket bad ïa ki 3 wiket la khur da u Adarsh Joshi. Ïa ka nam Player of the Match la khur da u Raj Biswa.
