Shillong, Ïaïong 07
Ka Convocation kaba 39 jong ka Indira Gandhi National Open University (IGNOU) la pynlong ha ka Convention Centre, IGNOU Campus Maidan Garhi, New Delhi ha ka 7 tarik u Ïaïong, 2026 bad ha kajuh ka por ha ki 51 tylli ki IGNOU Regional Centre ha kylleng ka ri.
U C.P. Radhakrishnan, Vice President ka ri India, kum u Kongsan ha kane ka sngi u la ai ka jingkren Convocation ha ka Headquarters, IGNOU Maidan Garhi.U Joseph Somi, Regional Director, u la pdiang sngewbha ïa u Symbud Kongsan, ki riew pawkhmat, ki nongthoh khubor bad ki samla pule sha ka Convocation kaba 39.
Ha ka jingkren pdiang sngewbha jong u, u la pynpaw ïa ki jingïarap pule bapher-bapher bad ki kam peitngor kiba la leh da ka Regional Centre ha ka Academic Session 2025-2026.
U la kdew ruh ïa ki jingjop jong ka Regional Centre. U la ai jingïaroh ruh ïa ki samla pule kiba la pass bad kyntu ïa ki ban long kiba dei hok ïa ka Degree kaba ki la ïoh na kane ka Skulbah bad ban long ki nongmihkhmat jong ka IGNOU.
Ka IGNOU ka la ai Certificate, Diploma bad Degree sha ki 3,24,000 ngut ki samla pule ha kane ka Convocation kaba 39. Na kine baroh, 1313 ngut ki samla pule ki dei kiba la pyndep na ka IGNOU Regional Centre Shillong.
U Dr. Ashiho A Mao, Hon’ble Vice Chancellor ka Martin Luther Christian University (MLCU), Shillong, kum u Symbud Kongsan ha IGNOU Regional Centre Shillong, u la ai ka jingkren ha Convocation.
Ha ka jingkren jong u, u la ong ba mynta ka rukom pule ka dang kylla stet bha, bad ka jingïawan rung ki kor stad thymmai kum ka AI, ki jingïasnoh bynta hapdeng ki jingpule bapher-bapher bad ka jingïatreilang ha ka pyrthei.
Ka IGNOU ka dei ban bteng ban wanrah ki jingthaw thymmai, ban pynïaid katkum ka por bad ban long ka nonglam lynti ha kane ka jingkylla, ban pynthikna ba ka dang long ka shlem pule kaba kongsan ha ka pyrthei.
U la ai jingïaroh ruh ïa ki nongïoh Degree ba ka Degree kaba ki la ïoh kam dei tang ka Certificate hynrei ka dei ka jingïarap sha ki lad kiba thymmai, ka burom ïalade bad ka bor jong ka jingstad, bad ha kane ka rukom ka pyndep ïa ka thong jong ka ban tei ïa ka imlang sahlang kaba stad.
U la ong ruh ba ka “Viksit Bharat” ka dei ka jingïohi jngai jong ka ri India ha kaba man u wei pa u wei u nongshong shnong u don ka lad ban pule, ban roi bad ban noh synñiang.
Ka dei ka India ha kaba ym don mano-mano ka jingmut jingpyrkhat jong ki samla kaba shah iehnoh namar ka jingduk, jingjngai ne jingbym don lad. Ka dei ka ri ha kaba ka jingpule ka poi sha u briew uba khatduh – bad kata kadei kaei kaba ka IGNOU ka la leh la jan saw phew snem.
Mynta, katba phi la pass, la phi long nonghikai, nongseng kam, nongrep, nongtrei bank, nongsumar ïing ne nongtrei Sorkar – ka kam jong phi, lada leh da ka jinghok bad ka jinglah bha, kan tei ïa ka Viksit Bharat. Kynmaw ba lada phi jop, ka ïing ka sem jong phi ka kiew, lada ka ïing ka sem ka kiew, ka shnong ka thaw ka kiew, bad lada ki shnong ki thaw ki kiew, ka ri ka roi ka par.
