Ka jingmih na ka eksamin Secondary School Leaving Certificate (SSLC) ba la pynlong da ka Meghalaya Board of School Education (MBOSE) ka pyni ba ha kine ki ar snem ka jingpass jong ki khynnah ka la kiew shisha ym shuh kum ha ki snem kiba la leit. Ym tang ka jingkiew, hynrei wat sha Ri-lum Garo ruh ka la kiew bad ka pyni ïa ka jingtrei shitom ka Sorkar Jylla ban kyntiew bad pynbha ïa ka pule ka puthi ha Rilum Garo. Haba phai sha ka SSLC, ka jingdon jong ki khynnah pule kiba ‘pass’ mynta u snem ka long 86.84%. Baroh ki khynnah pule kiba ïakhun ïa kane eksamin ki don 48,623 ngut ba kynthup ïa 28,485 ngut ki kynthei. Na kitei ki 48 hajar tam, ki khynnah pule kiba la ‘pass’ ha ka SSLC ki don 42,228 ngut ba kynthup ïa 17,481 ngut ki shynrang. Na kane ka jingkheiñ hangne, la kdew shai ba ka jingdon jong ki khynnah pule kiba ‘pass’ ha baroh 5 tylli ki distrik ka Ri-Lum Garo ka la kiew sha ka 70% palat.
Ki la don haduh 18,852 ngut ki khynnah kiba na Ri-lum Garo kiba la ïakhun ïa kane ka eksamin SSLC, bad kiba la pass ki long 14,479 ngut ki khynnah. Haba kheiñ ïa ka jingpass bha ki shynrang bad kynthei, ka jingpass ki shynrang ba ïaleh regular ka kot 94.14% katba ki kynthei ka kot 92.88%. Haba nujor ïa ka result hapdeng ki district, ka West Jaiñtia Hills ka dei kaba don bun eh kiba pass kaba kot haduh 94.99%, bud sa ka South West Khasi Hills-94.60%, East Khasi Hills-94.17%, Eastern West Khasi Hills-93.31%, West Khasi Hills-92.95%, East Jaiñtia Hills-92.85%, South Garo Hills-88.48%, Ri-Bhoi-88.04%, West Garo Hills-77.75%, ka East Garo Hills-72.33%, South West Garo Hills-74.54%, bad North Garo Hills-72.70%.
Kine ki dei ki jingkheiñ ba la pynmih da ka MBoSE bad ym ba shu thaw na madan ha madan, bad ka pyni ba ka Sorkar Jylla ka la trei shitom na uwei u snem sha uwei pat bad ha kaba ka la lah ban leh eiei ban pynbha ïa ka pule ka puthi ha Ri-lum Garo. Ka jingkob ka Sorkar ban kyntiew bad pynbha ïa ka pule puthi hapoh ka Jylla ka la sdang ban pyni ïa u soh. Ngi ju sakhi ba ka Sorkar ka la ju pynpaw ba ka la pynlut bun ha ka ban pynbha ïa ka pule ka puthi ha kylleng ka Jylla bad kane mynta ka la paw lyngba ka jinglah jong ki khynnah ban pass bha.
Haba phai ha ki snem shapoh jong u 2024, ngi la ju sakhi ba ka jingpass jong ki khynnah kam long kumba la khmih lynti bad khamtam lei haba phai sha Ri-lum Garo ka result ka ju long kaba sniew bha. Ha ki snem kiba la leit, ka jingshah bat ne ‘fail’ jong ki khynnah ka long bun bha bad ka ju buh jingma shikatdei ban pyrkhat ïa ka lawei ka jong ki bad khamtam lei ïoh ki shah pynshoi na kadiang bad na kamon ban leh da kiwei pat ki jait kam ki ban ktah kylla pat ïa ki. Hynrei kumba ka paw mynta, ngi ïohi ba nalor ka jingleh shitom ka Sorkar, ki khynnah ruh ki la pynlut shisha ka por ha ka jingpynkhreh ka jong ki. Ngi ai burom ruh ïa ki skul, ki nongpynïaid khamtam ki nonghikai bad ki kmie ki kpa kiba la lah shisha ban trei shitom.
Kawei pat ka jingeh mynta, ka long haba bun kiba pass kan shem jingeh pat ha ka ban ïoh ‘Class’ ne ka jaka pule khamtam lei haba kiba bun ki ïabeh ban wan pule ha sor Shillong. Ka pyrthei ka la kylla katba nang ïaid ki snem bad kan hap ban kylla katkum ka jingdawa jong ka por. Ryngkat bad ka jingnang jingtip, donkam ruh ïa ka jingpyntbit ïalade ha ki sap ki phong – sap rwai, ïalehkai, ban shet ban tiew, khap shñiuh, ñiah kali, bad bun jait kiwei pat. Ha man la ki briew, ki don beit ki sap ki phong. Kaei kaba donkam ka long ban wad bad sngewthuh ïa kita ki sap ki phong bad ban pynjanai ïa ki khnang ban lah ban ïeng ha la ki kjat ha ka kamai ka kajih.
