Shillong, Ïaïong 07
Ka Jylla ka la sei 7 ngut ki nongïalehkai athletics ki ban leit shim bynta ha ka Indian Athletics Series- 3 ban pynlong da ka Athletics Federation of India ha ka 11 tarik mynta u bnai ha Jawaharlal Nehru Stadium, Delhi.
Ha ka kyrdan Senior ki long u Donbok Shabong (100m & 200m), Kimkim Ch Momin (100m & 200m), Marshal Wanñiang (1000m), ka Balasiewdor Pathaw (1000m) bad ka Marqueenless Ramsiej (10000m). Katba ha ka liang ki Junior ki long u Yiarmanwill Rymbai (200m) bad u Lastly Suchiang (400m).
Hashwa ba kane ka kynhun kan mih na ka nongbah, na ka liang ka Meghalaya Athletic Association (MAA) ha ka sngi Ba-ar ka la pynlong ïa ka jingïalang kaba kyrpang ha SAI Training Centre kaba ha NEHU na ka bynta ban ai khublei kitbok ryngkat ki jingkyrkhu kyrdoh ïa kine ki khynnah khnang ba ki lah ban ïalehkai bha bad ban wanrah burom ïa ka Jylla hi baroh kawei.
Baroh kitei ki khynnah ki dangdon hapoh ka jingpynkhreh na ka bynta ka 39th National Games 2027 ka ban long ha ka Jylla.
Kiba la don lang ha katei ka sngi ki long u Bah E. M. H Passah, Sr. Vice President ka Meghalaya Athletics Association, kumjuh u Bah Finely L Pariat, General Secretary bad u Amarveer Singh, National Coach & Coach jong ka NG Team Preparation. Ïa ïadon lang ruh u Bah Pleasantly Synnah, Joint Secretary, Bah Pynhun Rapthap, Treasurer, ka Prachi Chaudhury (Olympian and Asian Games medallist) kaba dangdon hapdeng ka jinglanmet ha kane ka nongbah na ka bynta ka Asian Games 2026 ka ban long ha Japan.
