Shillong, Ïaïong 07
Ka Alisha Lyngdoh bad ka Bonifilia Shullai ki la long ki ar ngut ki ‘thei ïalehkai ka Jylla kiba la don hapoh ka kynhun ïalehkai U-17 jong ka ri ki ban shim bynta ha ki lai tylli jingïalehkai paralok pyrshah ïa ka Russia ha Sochi ka ban long ha ka 11, 14 bad 17 tarik mynta u bnai.
Kane ka la wan hadien ba ka coach ka kynhun ïalehkai ka ri, ka Pamela Conti ka la pynbna ïa ki kyrteng ki 23 ngut ki ‘thei ïalehkai na ka bynta kane ka jingleit ïalehkai. Ïa kine baroh lai tylli ki jingïalehkai yn pynlong ha Matsesta Football Center kaba ha Sochi.
Kine ki jingïalehkai paralok jong ka India ki long shi bynta ka jingpynkhreh na ka bynta ka AFC U-17 Women’s Asian Cup China 2026. Te kumta kane ka kynhun ka la poi ha Sochi ha ka miet jong ka lah sngi U Blei, ha kaba ka la leit sha Yangon na ka bynta kitei ki jingïalehkai paralok.
Hashwa ba kane ka kynhun jong ka Conti kan leit sha Russia, ka la ïoh ban kilanmet ha Bengaluru.
Ha ka Asian Cup ka ban long ha Suzhou, ka India kaba don ha ka Group-B kan ïakhun pyrshah ïa ka Australia ha ka 2 tarik u Jymmang, kumjuh ïa ka Japan ha ka 5 tarik bad ïa ka Lebanon ha ka 8 tarik u Jymmang.
