Mumbai, ïaïong:
Ka seng Congress ha Maharashtra ka la aiti ïa ka shithi kaba don ki jingdawa, ki jingeh bad ki jingai jingmut sha u heh ophisar ka jylla u S Chokalingam ha kine ki khyndiat sngi ba la lah, ha kaba ka la kyrpad ïa ka Election Commission ban pyntreikam ïa ka Special Intensive Revision (SIR) ha ka rukom kaba hok bad kaba shai.
Ka shithi ka pynmih ïa ka jingsngewkhia ba ïa ki vote jong ki jaitbynriew ba la phiah bad jong ki kynhun jaitbynriew ba kyrpang la thmu ban weng noh na ka thup thep vote, katba ha ki katto katne ki jylla, la ïathuh ba ki don ki jingbym ïahap kiba jur ha ki jingpyntreikam ïa ka SIR.
“Ïa kane ka jingpan ban pyntreikam ïa ka SIR la pynlong tang hashuwa ka elekshon da ka jingthmu ba sniew ban ai ïa ka bor ba halor sha ka liang synshar. Namarkata ka jingpan SIR ha Maharashtra ka dei ban long khlem da kyrkieh, ha ka rukom kaba khlem liang bad kaba hok” la dawa u President ka seng Congress ha Maharashtra u Harshvardhan Sapkal.
U Sapkal u la ïathuh ruh ba ïa kane ka kam ba ïadei bad ka SIR ha Maharashtra la ju pynlong mynshwa hapdeng u snem 2002 haduh 2004 ha ka por ba la jan 13 bnai khlem kano kano ka jingpynsted ne kyrkieh.
“Mynta, hadien 25 snem, da ka jingkiew kumba 35 million ngut ki nongthep vote, ka rukom treikam ka dei ban plan katkum kane.Namar ba ym don elekshon ha Maharashtra ha kine ki ar ne lai snem ban wan, ka don ka por kaba biang ban pynlong ïa ka SIR ha ka rukom kaba hok” ong uwei u nongïalam ka Congress.
“Wat lada ka shim por ar snem ruh ngi ki riew saiñ pyrthei kiba paw ngim don jingpyrshah ei ei. Nalor kata, ïa ka jingkheiñ jaitbynriew bad ka SIR ym dei ban leh da ki juh ki heh ne ki nongtrei. Dei ban shaniah ha uwei u ophisar tang kawei ka kam, nangta tang u ophisar ba kyrpang un lah ban ai ïa ka hok ïa ka kam jong ki”, la ong shuh shuh une u nongïalam.
Ka shithi ka la ong ruh ba dei ban pynbiang ïa ka seng saiñpyrthei bad ki nongmihkhmat jong ka ïa ki jingtip ba la pynshisha jong ka SIR ha ki Soft copy, OCR, bad ki dur ba lah ban pule da ki mashin, bad kumjuh ruh ha ki Hard copy.
Ka shithi ka la ong shuh shuh ba dei ban ailad ïa ka por kaba ym duna ïa ka hynñiew sngi ïa ki nongthep vote ban pynpaw ïa ka jingpyrshah bad ban jubab ïa ki jingpynbna kiba ïadei bad ka SIR.
“Ki Booth Level Officers (BLO) kim dei ban trei satia hapoh ka jingpynbor na kino kino ki riew shimet, ki seng, ne ki nongïalam saiñ pyrthei. Dei ban pynlong ïa ka jingïakhih kaba kyrpang na ka bynta ban pynrung kyrteng ïa ki Booth Level Agent (BLA). Bad baroh kawei ka jingbuh jingkheiñ na ka SIR baroh kawei la dei ban buh bha la kumno kumno san snem ha ki kyrdan ERO bad DEO bad ba la dei ban pynbiang ne phah jingtip sha ki seng saiñ pyrthei kumba donkam,” la ong ka shithi.
Ka la ong shuh shuh ba dei ban bishar bniah bha ïa ki aplikeshon Form 7 bad dei ban ai ha ka por kaba biang ïa ki thup jong ki nongthep vote kiba la buh dak kum ki ‘bym don, ba la pynkynriah ne ba la ïap’ (ASD) sha ki seng saiñpyrthei ba la ithuh ha ka kyrdan jong ki jaka thep vote.
