Une u Kohnahba ki khot ïa u Lyoh ne Laput ha ki briew ka shnong Thangrai (Nongnah). Balei ki khot Koh-nah – ba ? Ka long kumne keiñ. Ha ka por ba ngi dang ïa long khynnah ha shnong, ngi ju mlien ban leit sum leitsleh hapoh ka wah kaba don harud shnong. Baroh ki nongshong shnong ki ju leit saitjain saitnep bad ïasum ïasleh ha kane ka wah ne kaba la tip kum ka phod shnong. Ngi ki khynnah rit ngi ju ïa leit sum hapoh wah ha ka um bunsien bunsien man ka sngi bad ïa jngi ha ki thwei jong kane ka phod shnong.
Te ynda ngi la ïajngi hapoh um bad ngi ïa mih noh napoh um shipor arpor bad ïa wan shong bad dem jahthait harud ki maw kiba jlih ban pynsyaid ïa ka met ba khriat. Te haba ngi la ïa song syaid sngi bad ïa don ha ki maw ban pynsyaid bad pynryng-khiang.
Hynrei ka jinglong ka mariang ne ka suiñbneng teng teng ka mih bha ka sngi bad teng teng ka dum ba kah ne tap u lyoh ïa ka jingshai ki kjat sngi. Kumta kum ki khynnah rit haba kah dum bad tap u lyoh ne laput ïa ka jingshai ka sngi. Kumta ngi ïa khot bad ïa pyrta bad kyrpad ïa u Koh-nah -bah (Lyoh) ba kah ka sngi ha suiñbneng ba un pyllait ïa ka Meingi ba kan ai jingshai bad pynsyaid ïa ngi ki khun bynriew. Te hangne keiñ nga sngewthuh ba ka kyntien Koh – Nah – ba ka mut bad ka thew ïa u lyoh ba kah dum ïa ka jingshai jong ka sngi. Kane ka kyntien Kohnahba ka dei ka ktien shnong kaba khot ïa u Lyoh bad kumta ngi dei ban pynneh pynsah keiñ ïa la ka jong ka ktien. Nga tieng ïoh duh noh ki ktien shnong ha ka ri baieit jongngi.
C. B. Iawphniaw
