Shillong, Ïaïong 08
Ka lahduh jong ka Champions Cup 2025, ka Nong-kseh SSCC kan pynkhreh ïa ka jingïalehkai kaba nyngkong pyrshah ïa ka Khimusniang SC ha ka 5th Meghalaya State League (MSL 5), ka ban long ha ka 15 tarik mynta u bnai ha SSA Stadium First Ground, Polo.
Ïa kane la pynbna da ka Meghalaya Football Association (MFA) ha ka sngi Balang. Kane ka jingïakhun kaba dei artad jong ka Group-A kan sdang ha ka por 5 baje janmiet, ha kaba u Myntri ba dei khmih ïa ka tnat Sports & Youth Affairs u Bah Wailadmiki Shylla un long u kongsan.
Ka Nongkseh kaba dei kawei na ki klob kaba la sdang bha ba kan khring ïa ki khmat u paidbah nongpeitkai, hadien ka jinglah ban paw bad ban ïalehkai bha ha ka samoi ïalehkai ba la lah, kaba wan hadien ba ka la lah ban rah ïa ka nam lahduh ha ka First Division, kumjuh ïa ka Champions Cup, ha kaba baroh artylli kine ki lympung ki dei ba la pynlong da ka Shillong Sports Association.
Katba na ka liang ka Khimusniang, kaba la rah ïa ka nam lahduh ha ka ‘U Kiang Nangbah Memorial Trophy (Super Division) ba la pynlong da ka West Jaiñtia District Sports Association ha ka samoi ïalehkai 2025.
Kane kan dei ka sien ba nyngkong ïa kine ki artylIi ki kynhun ba kin ïakhun pat sa ha kum kane kawei ka lympung baheh duh ha ka Jylla ba la pynïaid da ka MFA bad ïa kane ka lympung la kyrshan lang da ka tnat ïalehkai ka Sorkar Jylla.
Mynta ka kynti, ka MSL kan long kaba kham kyrpang namar jia ryngkhat ba ka MFA ka rakhe ruh ïa ka Golden Jubilee.
Ha ka jingshisha ïa ka MSL-5, la thmu ban sdang ha ka sngi 12 tarik mynta u bnai, hynrei ka Centralised Registration System (CRS) ka All India Football Federation’s (AIFF) ka la kham pynjlan noh ïa ka por sdang .
Kaba kham sngewtynnad ban tip hangne ka long ba ha ki saw samoi ïalehkai kiba la dep, la rah nam lahduh da ki kynhun ki kynhun ïalehkai bapher bapher. La rah nyngkong da ka Niaw Wasa United ha u 2017-18, hadien ka Shillong Lajong (2019), Rangdajied United (2023) bad ka Mawlai (2024-25).
