Shillong, Ïaïong 08
Ka jingshah tuh jong ki kali arshaka ka la nangjur na kawei ka sngi sha kawei pat nalor kiwei pat ki kam tuh kam thiem kiba dang ïai bteng bad ïa kane lah ban sakhi na ki jingjia shah tuh kiba dang shen na kylleng ki bynta jong ka sor Shillong bad na kiwei ki jaka ruh kumjuh.
Katkum ka khubor na ki pulit la ong u Bah Passcal Mawlong u la ai ka jingujor ba ha ka step jong ka 6 tarik mynta u bnai, ki runar bym lah ban ithuh ki la tuh ïa ka arshaka jong u kaba don ïa u registration number ML10-D-6055 na ka jaka sah jong u ha Nongrah, Dong-Nongkhriam, Shillong.
Ha ka miet jong ka 6 tarik mynta u bnai, ki runar bym lah ban ithuh ki la tuh ïa ka arshaka kaba don ïa u registration number ML05-S-5120 kaba dei trai da ka L Chawngthu na Thembasuk Madanrting, Shillong.
Ha ka step jong ka 7 tarik mynta u bnai, ki runar bym lah ban ithuh ki la tuh ïa ka arshaka kaba don ïa u registration number AS01-FH-1740 kaba dei trai da u Sonam Gyatso na ka thaiñ Mawpat, Shillong.
Kumjuh ruh ha ka 7 tarik mynta u bnai, ki runar bym lah ban ithuh ki la tuh ïa ka arshaka kaba don ïa u registration number ML05-Z-1071 kaba dei trai da u Clomen M Sangma na ka thaiñ Itshyrwat, Shillong.
Ha kawei pat ka khubor, u Jackmanwel Puweiñ u la ai ka jingujor ba ha ka 21 tarik Lber, 2026, u la lap ba ki runar bym lah ban ithuh, ki la tuh ïa kiba bun ki tiar kiba shongdor kumba T.2,39,825/- na ka mobile tower kaba don ha ka shnong Domshrah (SWKH).
