Shillong, Ïaïong 08
Na ka jingïoh jingujor ba ka don ka jingshah leh baheh ki katto katne ki khynnah pule ‘Nursing’ ha ki para khynnah ba ïa pule lang ha Vatsalya Institute of Nursing & Paramedical Sciences, ka State Youth Wing & Women’s Wing jong ka Voice of the People Party ka la leit ban pan jingshai na ki bor pynïaid jong katei ka shlem pule haba ïadei kane ka jingjia.
Hadien ka jingïathir ïatai kaba la neh la kumba shi kynta tam eiei bad ki nongpynïaid jong katei ka shlem pule, haba ïoh ban ïakren ïa u Bah Marbud Dkhar, President VPP State Youth Wing u la pynpaw ba ha kine ki khyndiat taïew ba la dep ka la don ka jingïadih ïa bam bad ki jingleh ba ym ïahap satia kum ki khynnah pule ‘Nursing’ bad na kane ka jingleh baheh jong ki katto katne ki la don ruh ki khynnah pule kiba la sangeh noh ban bteng ka jingpule ha katei ka shlem pule.
Ka VPP ka la maham ïa ki bor pynïaid jong katei ka shlem pule ba ki dei ban pynthikna bad ban pynlong ka jingpeit bniah ïa ka rung ka mih jong ki khynnah bad ba kum kine ki jingjia hapoh ka shlem pule kim dei shuh ban jia nangne shakhmat. Ka VPP ka la dawa na ki bor pynïaid ba dei ban weng mardor hapoh arsngi ïa ki khynnah kiba don bynta ha ka ban pynmih ïa kine ki kynrum kynram bad maham jur ba lada ki bor pynïaid kim leh eiei, ka VPP kan sa shim da kiwei ki sienjam wat ban khang tala ruh ïa katei ka shlem pule.
U Bah Marbud u la kynnoh ba ka rukom pynïaid ïa katei ka shlem pule kam long kaba bit ba biang bad ka long kaba laitlan haduh katta-katta bad pynpaw ba na ka liang ka VPP kan sa phah jingthoh halor kane sha ka Meghalaya Nursing Council bad sha ka ophis DHS. U la ïathuh ba kane ka shlem pule kaba don ha Nongrah, Dongktieh ka dei kaba la pynïaid da ki riewshimet bad kaba la don mynta la kumba lai snem eiei.
U la kyntu ruh ïa ki khun samla kiba don ha katei ka shlem pule ba kim dei ban tieng ban randien tang na ka daw kine kiei-kiei, hynrei ba ki dei ban pyneh bad ba ym dei ban ailad kum kitei ki jingleh ha ki jaka pule.
