Shillong, Ïaïong 08
Ka Sputnik CC ka la pynliem noh ïa ka Lang-sning XI CC da 6 wiket na ka bynta ban bat ïa ka kyrdan ba hakhlieh ha ka Group-1 (Super 8) jong ka P.A. Sangma Memo-rial T20 Cricket Tournament 2026 ba la pynlong da ka Shillong Cricket Associa-tion ha ka sngi Balang.
Lyngba kane ka jingjop, ka Sputnik ka la long ka kynhun kaba khlem shah rem ha ka Super-8 ha kaba ka la kamai 6 poiñ, katba ka Langsning ka la kamai 4 poiñ. Te kumta kine ki kynhun ki la rung sha ka semi final na kane ka group. Katba ka Young Guns (2 poiñ) bad ka Lok Bhawan (0) ki la duh noh ban jam sha ka semi final.
Haba phai sha kane ka jingïakhun ka Langsning XI kaba la kam trai ban tied nyngkong, ka la kamai 122 run bad shah pynhap 9 wiket ha ki 20 over. U Bamanbha Shang-pliang u la khyrwit ïa ka shiteng spah kaba 54 run na ki 50 bol bad u Ibit Thabah u la ïoh 20 run na ki 11 bol. Katba u Kshittij Singhania u la khur 3 wiket bad ïa ki 2 wiket la khur da u Aditya Singhania.
Hynrei ka Sputnik ka la lah ban kynjoh sha ka thong tang ha ki 16.1 over da kaba kamai 123 run bad shah pynhap 4 wiket. Kane ka la wan lyngba ka jingïalehkai bha u Punit Bisht uba la ïoh ban khyrwit ïa ka shiteng spah kaba 90 run na ki 55 bol bad u Cha-man Pushp u la ïoh 24 run na ki 29 bol. Katba u Riboklang Hynñiewta u la khur 3 wiket bad ïa ka 1 wiket la ïoh da u Aaron Nongrum. Ïa ka nam Player of the Match la khur da u Punit Bisht.
Haba phai sha kawei pat ka jingïakhun jong ka Group-2 ka Royal CC ka la jop suk da ka walk over hadien ba ka Capital Stars kam shym la wan mih madan. Te kumta ka Royal ka la kamai 6 poiñ na ka bynta ban long ka kynhun kaba khlem shah rem, katba ka Rangkynsai CC (4 poiñ) ka la wan ba-ar na ka bynta ban rung sha ka semi final.
Katba ki ar tylli ki kynhun ïalehkai na Assam kata ka Rhino Land bad ka Capital Stars ki la duh rung sha ka semi final bad ki la hap ban leit phai noh sha la ïing.
