Kolkata, ïaïong:
Ka Election Commission of India (ECI) ha ki khyndiat sngi jong ka taïew ba la lah, ka la pan ïa ka kaiphod jong ka jinglong jingman ha kaba ïadei bad ki jingbthah jong ka ban weng noh ïa ka jingïada ba la ai da ka sorkar na ka bynta ki nongïalam saiñ pyrthei kiba don ki jingshah mudui halor ki kam runar na ka bor synshar pulit jong ka West Bengal namar ba ka jylla ka la pynkhreh ban leit thep vote ha ka 23 bad 29 tarik, Ïaïong.
Ka ECI, ha ki jingbthah jong ka sha ki Nodal Officers jong ka West Bengal (WBP), ka la pan ban phah ïa ka kaiphod jong ka jingbud ryntih haduh ka por shiteng sngi, hadien ba la kut ka por ba la buh jong ka kaba la long ha ka por shiteng miet jong ka sngi Palei, na ka bynta ban weng noh ïa kum kane ka jingpynbiang ïa ka jingpahara.
Ki nongïalam, kiba la shah jamin ne kiba la mih na phatok da ka parole kaba la pynduh pyndam ïa ki jingïadei jong ki ha ka saiñ hima sima, kin ym ïoh ïa ka jingïada da ka jingpahara da ka sorkar jylla naduh mynta.
Ka ECI ka la bthah ïa ki District Magistrate (DM) bad ki District Election Officers (DEO) bad ki Superintendent of Police ha kylleng ki distrik ha ka jylla ban weng noh ïa ka jingïada ‘bym donkam’ kaba la don lypa na ka bynta kine ki nongïalam kiba don ki jingshah mudui mukotduma.
Ka la bthah ruh ba yn weng noh ruh ïa ka jingïada na ka bynta ki nongïalam kiba la ïoh ïa kum kine ki jingmyntoi haba pyrkhat ïa ki kam jong ki bad ïa kiei kiei kiba la khot ki jingsngewthuh byrngem.
Nalor kitei ki jingbthah, ka Commission ka la bthah ruh ïa ki bor synshar pulit ha ka jylla ban kem ïa kito ki briew kiba shah kynnoh ha ki mukotduma bym lah ban ïoh jamin hapoh shi sngi.Ki pulit jong ka Central Reserve Police Force (CRPF) kiba peit ïa ki kali hashwa ka elekshon sha ka ïingdorbar thawaiñ jong ka West Bengal.
Ha kajuh ka por, ka ECI ka la bthah ïa baroh ar ki pulit jong ka jylla bad ki pulit jong ka Kolkata ban pynsted ban pynbeit ïa ki kam runar kiba ïadei bad ka jingthep vote na ki elekshon ba la dep.
Ki heh ophisar ha ki jaka treikam, kynthup ïa ki Sub-Division Police Officer (SDPO) bad ki Deputy Superintendent of Police (DSP), ki la shah bthah da kaba kin pynkhreh ïa ka thup jong kiba shah kynnoh kiba phet krad bad ban pynlong ïa ki jingkhynra ba la thmu ban kem ïa ki.
La bthah ïa ki Station-level Officer ban ithuh ïa ki jaka ba don ki kam runar, ban buddien ïa ki nongthoh histori, bad ban tehlakam ïa ki jingshah thombor kiba lah ban mih na ka jingthep vote.
Ka Commission ka la pan jingshai ruh na u DGP jong ka jylla, u Siddh Nath Gupta halor ka jingbun ki nongïalam bad ki nongtrei kiba dei na ka liang synshar Trinamool Congress kiba ïoh ïa ka jingïada ba la pynbiang da ka sorkar jylla. La bthah ïa u Gupta ban aiti ïa ka kaiphod ha kaba ïadei bad kane hapoh ar ne lai sngi, la ïathuh ki tyllong khubor jong ka ECI.
Haduh 2,185 ngut ki pulit ki dang trei na ka bynta ka jingïada na ka bynta kumba 832 ngut ki nongïalam bad ki nongtrei jong ka Trinamool Congress bad haduh 140 ngut ki nongkyrshan jong ka seng synshar naba ïa ki tarik thep vote ha Bengal la pynbna.
“Balei ki nongïalam ka seng synshar ki dawa bun ki pulit jylla na ka bynta ka jingpahara?La bthah ïa u DGP ban aiti ïa ka kaiphod da kaba pyrkhat ïa kane ka mat khlem liang bad da ka jingtbit”, la ong ki tyllong khubor kiba kwah ban ym pynpaw kyrteng.
Ka komishon ka la ban jur ruh ïa ka jingdonkam ban pynthikna ïa ka jingshngaiñ na ka bynta baroh ki kam ïalap elekshon, khlem da kheiñ ïa ka seng, bad ban ïada ïa ki briew kiba trei ha ki kam elekshon.
Hadien ba la bishar bniah ïa ki khubor jong ki kam thombor kiba ïadei bad ka jingshah weng jong ki nongthep vote ba la shah bishar na ki thup ba la pynkhreh da ki ophisar jong ka tnad bishar ka komishon ka la rai ruh ban pynjlan ïa ka jingpyntreikam ïa ki shipai ka Central Armed Paramilitary Forces (CAPF) hadien ba la pynbna ïa ka jingñiew vote ka ban long ha ka 4 tarik u Jymmang ha ka jylla.
Ka jingkulmar, ka la mih ha ki bynta jong ka jylla, hadien ka elekshon sha ka ïingdorbar thawaiñ jong u snem 2021, ha kaba ka Trinamool Congress, kaba synshar, ka la wanphai biang ha ka bor synshar, ha ka sien kaba lai.
Nalor ka jingpynjlan ïa ka jingpyntreikam, 200 tylli ki kynhun jong ki CAPF kin don ha ka jylla ban pynskhem ïa ki mashin thep vote (EVM), ki kamra ban khlaiñ ka jingai jingai jingshngaiñ, bad ki jaka ñiew vote haduh ban da pyndep ïa ka jingkheiñ ïa ki vote, ong shuh shuh ka khubor ba la wan na ka ECI.
