Shillong, Ïaïong 08
U Myntri Rangbah ka Jylla, u Conrad K. Sangma, ha ryngkat u Symbud Myntri Rang-bah, u Bah Prestone Tynsong, ha ka Sngi Balang, ki la leit ban ïakynduh ïa u Myntri Sorkar Pdeng ka tnad Minority Affairs, u Kiren Rijiju, ha New Delhi, na ka bynta ban ïakren bad pynpaw ïa ki jing-sngewkhia haba ïadei bad ka jingtyrwa ïa ka FCRA Amendment Bill.
Ha kane ka jingïalang la ïadonlang ruh ki nongmihkhmat na ka Catholic Bishops’ Conference of India (CBCI) bad kiwei-kiwei ki nongïashim bynta. Kane ka kynhun ka kynthup ïa u President ka CBCI, ‘His Eminence’ Anthony Cardinal Poola, Secretary General, Most Rev Anil Joseph Thomas Couto.
Ha ka jingïakren, ka kynhun ka la pynpaw ïa ka bynta kaba kongsan jong ki shlem pule, ka koit ka khiah, bad ki shlem ai jingshakri ha ka imlang-sahlang ha kylleng ka Jylla bad ka Thaiñ Shatei Lam Mihngi, khamtam ha ki jaka ba jngai bad ki thaiñ ‘riewlum. Bun na kine ki shlem, kiba la kyrshan lyngba ki jingsynñiang bar-ri, ki ïai bteng ban shakri ïa ki jaidbynriew kiba sahdien bad ki synñiang shi kat dei sha ka roi ka par jong ka thaiñ.
Ka kynhun ka la pynpaw ruh ïa ka jingsngewkhia halor ki katto-katne ki kyndon ha katei ka jingtyrwa ka ban wanrah jingkylla, khamtam kito kiba ïadei bad ka jingkurup ïa ki jingdon-jingem, kiba la pynmih ïa ka jingartatien hapdeng ki kynhun Khristan bad kiwei-kiwei ki kynhun seng ha ka imlang-sahlang. Ki la ban jur halor ka jingdonkam na bynta ka jingïamir jingmut kaba ïar bad ki jingïakren ba bniah ban pyntikna ba ïa kum kine ki jingsngewkhia la shimkhia ha ka rukom kaba biang eh.
“Ngi la pynsngew ïa ki jingsngewkhia ba la pynpaw da ki kynhun Khristan, khamtam eh ha kaba ïadei bad ki kyndon ba ïadei bad ka jingkurup ïa ki jingdon-jingem, bad ban jur halor ka jingdonkam ban don ïa ka rukom treikam kaba ïabiang lang bad kaba ïamir-jingmut,” ong u Myntri Rangbah ka Jylla.
Haba pynpaw ïa ka jingktah kaba ïar jong kine ki shlem pule, u la bynrap, “Ki shlem kiba la kyrshan lyngba ki jingsynñiang jong kiba nabar ri ki don ïa ka bynta ban wanrah jingkylla ha ka ban pynpoi ïa ka pule-puthi, ka koit ka khiah, bad ki jingshakri ha ka imlang-sahlang ha ki katto-katne ki jaka kiba jngai tam bad kiba sahdien jong ka Meghalaya bad ka Thaiñ Shatei Lam Mihngi.”
Na ka liang u Myntri Sorkar Pdeng, u Kiren Rijiju u la shah shkor ïa ki mat ba la pynpaw bad pyntikna ïa ka kynhun ba yn sa bishar bniah ïa kine ki jingsngewkhia.
U la pyntikna shuh-shuh ba yn sa pynlong ïa ki jingïamir-jingmut bad ki nongshim bynta bad yn sa pynlong ruh ïa ki jingïakren kiba donkam hashuwa ban poi sha kino-kino ki jingpynkylla ne ka rai ba khatduh.
“Nga ïoh mynsiem na ka jingpyntikna jong u Myntri Sorkar Pdeng, u Kiren Rijiju ba yn pynlong ïa ki jingïamir-jingmut kiba ïar bad ba yn sa khmih bniah ïa ki jingsngewkhia jong ki nongshim bynta hashuwa ban shim ïa kano-kano ka rai kaba khatduh,” ong u Myntri Rangbah ka Jylla.
“Ka jingthmu jong ngi ka long ban ïatreilang ha ka rukom kaba tei bad ka Sorkar India ban pyntikna ba ka aiñ kan ïada ïa baroh ar – ki jingmyntoi jong ka ri bad ïa ki jingsynñiang ba kordor jong ki shlem ai jingïarap lem bad ki kynhun niam,” u la bynrap.
Ka kynhun ka la ban jur ruh halor ka jingdonkam ban pynrung lang ïa ki lad jingïada kiba biang ha ka aiñ ban pyntikna ïa ka jingbteng jong ki jingshakri kiba kongsan ha ryngkat ka jingpynneh ïa ka jinglong kaba shai bha ryngkat ka jingkitkhlieh.
Ka la pynpaw ruh ïa ka jingdonkam ban ïada ïa ki hok bad ka jingtreikam jong ki kynhun niam lem bad ki kynhun ai jingïarap kiba trei na ka bynta ka bha ka miat jong ki imlang-sahlang.
Haba pynpaw ïa ka jingkyrmen hadien jong ka jingïalang, u Myntri Rangbah u la ong, “Ngi don ka jingkyrmen ba lyngba ka jingïakren bad jingïatreilang, kan mih ka jingpynbeit ka ban ïada ïa ki hok jong ki kynhun, ha ryngkat ka jingpynkhlaiñ ïa ki lad treikam kiba pyrkhing.”
