Shillong, ïaïong 08
Ka Balang Sohkymphor ka pyntip na ka bynta kito ki ban leit sha Ka Jingïaseng Samla KJP Assembly kaba Khatar (XII) ka ban long ha ki tarik 10th haduh 12th April, 2026 ha ka Balang Sohkymphor, Shangpung Presbytery, Sohkymphor District, KJP Synod Mihngi.
Katkum ka kyrwoh khubor ba la phah da u Tbn. P Langstang, Secretary Information & Broadcasting Committee ka Balang Sohkymphor ka pyntip ba ka shnong Sohkymphor ka dei kaba don ha East Jaiñtia Hills District, Meghalaya, kaba jngai kumba 97 kilometre eiei na sor Shillong bad kan shim por kumba 2 kynta shiteng lane 3 kynta eiei ban ïaid da ka kali.
Ban poi sha ka Balang Sohkymphor, ki nongwan ba na ka thaiñ Shillong proper kin ïaid na Mawblei – Laitkor ha ka surok Shillong – Jowai lane na NEIGRIHMS/Diengpasoh ha ka surok sha Jowai nangta na pung Thadlaskeiñ shim ïa ka surok Jowai ByPass haduh ha shuwa ban rung ha ka shnong Wapung hangne kan sa don ka khilon na ka liang ka diang ban poi sha ka shnong Sohkymphor.
Kiba wan na ka thaiñ 7mer Upper Shillong ki lah ban ïaid na ka surok Shillong Peak nangta na Laitkor ha ka surok Shillong Jowai ban poi ha pung Thadlaskeiñ sa khun sha Jowai ByPass.
Kiba dei na ki thaiñ East bad West Jaiñtia Hills District kin ïaid haduh Wapung shnong lad Sohkymphor, kan sa don ka khilon ban kdew sha u surok ban poi sha ka shnong Sohkymphor. Kiba dei na ki thaiñ Shangpung, Iooksi, Mookaiaw, Barato bad kiwei-kiwei na kine ki thaiñ la pynbeit ba kin ïaid na Shangpung Khliehrangnah, Lad mynska, Byrwai road.
La kyrpad ïa ki shnong kiba marjan jong ka Sohkymphor ban kiar ban ïaid napoh ki surok shnong Sohkymphor khnang ban lait na ka jingsahkut kali khamtam ha ka sngi u Trai.
