Bhubaneswar, ïaïong:
Kum shi bynta ban khanglad ïa ka jingpynrung kyrteng biang ïa ki kali kamai kiba la rim na kiwei pat ki jylla ha Odisha, ka sorkar ha ka lah sngi U Blei, ka la pynmih ïa ka hukum kaba khanglad ïa ka jingrung bad jingpynïaid ïa kum kine ki kali kiba la palat ïa ka 10 snem bad kiba la pynrung kyrteng shabar ka jylla.
Kane ka sienjam ka shim ïa ka jingmut haba peit ïa ka jingkhang ba la pynjari ha Delhi/NCR halor ka jingpynïaid ïa ki kali Diesel kiba la rim palat ïa ka 10 snem bad ki kali petrol kiba la rim palat ïa ka 15 snem namar ka jingsngewkhia ïa ka jingjaboh.
Ki tyllong khubor ki la ïathuh ba kum kane ka jingkhang shabar jong ka Odisha ka la pynkiew ïa ka jingma ba ki kali kiba la rim kin ïoh pynrung kyrteng biang ha kane ka jylla.
Ki heh jong ka State Transport Authority (STA) ki la ong ba ïa ka rai ban khanglad ïa ka jingrung bad jingpynïaid ïa kine ki kali la dep ban shim ha kawei na ki jingïalang jong ki kaba la long ha ka 19 tarik u Naitung 2023. Hynrei ki don ki ophis pynïaid kali jong ki thaiñ (RTO) ki bym pyntreikam ïa kane ka jingkhang watla la lap ïa kiba kum kine ki jingjia.
Katkum kane, la pynmih ïa ka jingbthah kaba thymmai katkum ka jingbthah jong u Myntri jong ka Commerce and Transport u Bibhuti Bhushan Jena ban pynbha ïa ka rukom kit jingkit jong ka jylla bad ban pynkhlaiñ ïa ka jingshngaiñ jong ki nongleit nongwan.
Katkum ka hukum jong ka STA, yn buh kyndon ïa ka jingrung bad kamai ïa ki kali kamai ha Odisha kiba la pynrung kyrteng ha kiwei ki jylla bad kiba la palat ïa ka 10 snem.
Yn ym ai Permit thymmai ïa kum kine ki kali ban kamai hapoh ka jylla.
La bthah ruh ïa ki RTO ba kim dei ban shah ban pynkylla ïa ka jaka sah, ban pynkylla ïa ka jinglong trai ne ban lum ïa kano kano ka khajna kit jingkit na ka bynta kum kine ki kali.
Ki heh jong ka STA ki la ïathuh ba la bthah ïa ki RTO bad ARTO ba kin pyrkhing bha ïa kane ka jingkhang.
Kane ka sienjam la khmih lynti ba kan pynbha ïa ki kyndon jong ka jingshngaiñ ha surok, ban pynduna ïa ki kali bym biang ha ki surok bad ban pynduna ïa ka jingjaboh kaba mih na ki kali kiba la rim ha ka jylla.
Ka sorkar jylla ka dang pynduh noh ruh ïa ki kali kiba la rim palat ïa ka 15 snem, kynthup ïa ki kali kamai bad ki kali shimet, kiba dang lah ban test ïa ka jingkoit jingkhiah katkum ki kyndon jong ka Odisha Registered Vehicle Scrapping Facility Policy-2022.
Da ki hajar tylli kum kine ki kali la dep ban bret, katba dang ithuh shuh shuh ïa kum kine ki kali ban bret ha ki jaka bret ba la ai bor, la ïathuh ki heh sorkar.
