Shillong, Ïaïong 08
Ka ophis u Inspector of Boilers & Factories jong ka tnad Labour, Employ-ment & Skill Develop-ment jong ka Sorkar Jylla, ha ka 08 tarik u Ïaïong 2026 ka la pynlong ïa ka jinghikai bad pynsngewthuh haba ïadei ka jingshngaiñ bad ka koit ka khiah jong ki nongtrei.
Ïa kane ka jingïakynduhlang la pynlong ha Regional Labour Institute kaba don ha Rynjah, Shillong ha kaba u Bah Methodius Dkhar myntri ba dei peit ka Labour, Employment & Skill Development u la wan ban long kum u kongsan, ha ka jingdon ryngkat lang u Samir Pandey uba long u Regional Labour Institute, Shillong, Bah F. R Kharkongor Principal Secretary, ka Kong M. War Nongbri, IAS, Commissioners & Secretary, ka Kong I Mawlong, IAS, kaba long ka Chief Inspector Boilers & Factories, Shillong bad ki nong sengkam ki trai jong ki kompeni bapher-bapher ba na ka Jylla bad na shabar.
U Bah Methodius haba ai jingkren ha ka jingïalang u la ïaroh ïa ka tnad Labour, ïa ka ophis Chief Inspector of Boilers & Factory bad ïa ka kynhun ba la lah ban pynïaid ïa kane ka prokram kaba la long ruh ka prokram kaba jop. U la ai khublei ruh ïa ki trai karkhana, ki nongseng kam seng jam kiba la wan ban ïashimbynta ha katei ka jingïakynduh lang.
Shuh-shuh u la pynpaw ïa ka bynta ba kongsan jong ki riew shimet ha kaba kyntiew ïa ka roi ka par, ban pynmih ïa ki kam, kaba la ïarap ruh ïa ki khun samla ha ka ïoh kam ïoh jam bad ban kyrshan ban pynkhlaiñ ïa ka ïoh ka kot jong ka Jylla. U la ban jur ba kin ai ka jingïatreilang bad ka Sorkar bad baroh kiba don bynta.
Nalor kata u la pynpaw ruh ba ka Sorkar ka la wanrah ïa ki lad ki lynti ha ka ban kyntiew ïa ki kam khaïi hapoh ka Jylla Meghalaya da kaba pynbeit ryntih ïa ki rukom treikam bad kyntiew ïa ka jingbei tyngka. Ha kajuh ka por, u la ban jur ïa ka jingdonkam ban pynneh ïa ki kyndon treikam, khamtam ha kaba ïada ïa ka jingshngaiñ, ka koit ka khiah bad ka jingbha jingmiat jong ki nongtrei.
U la khlei sha ki nongsengkam bad ki trai karkhana, kaba u la ong ba ka tnad Labour ka thmu ban ïatreilang bad ki karkhana, da kaba kyntu ruh ba kin ai ka jingïatreilang bad ka tnad da kaba bud ryntih ruh ïa ki kyndon jong ka jingshngaiñ.
U la pyntip ruh ba ka tnad kan pynlong ïa ki jingleit jngoh ïa ki karkhana ban bishar bniah ïa ki jinglong jingman ha ka kam bad ban pynshlur ïa ki ban bud ryntih ïa ki kyndon jingïada ha ka kam. U la pynkynmaw ruh ba ki trai karkhana haba ki wan ban buh ïa kino-kino ki karkhana lane ban wan sengkam hapoh ka Jylla ba kin long kiba burom bad bud ïa ki kyndon ban ïada ïa ka mei Mariang khnang ba kan ym don kano-kano ka ban wanrah jingeh ha ki por bad ki pateng ban wan.
