Shillong, Ïaïong 08
Ka Meghalaya ka la wanphai da ka jingjop ha ka NECDC U-19 Men’s One Day Tournament, hadien ba ka la lah ban pynliem noh ïa ka Nagaland da 3 wiket ha ka jingïalehkai jong ka Group-A ha ka sngi Balang ha Sovima.
Watla kane ka kynhun ka la shah rem ha ka Manipur da 144 run ha ka sngi Ba-ar, hynrei ha kane ka jingïakhun ka la lah ban ïakhun tyngeh na ka bynta ban khur ïa ka jingjop.
U Mewankitbok Khar-puri u la long u khlur ïalehkai ba kynsai ha kaba u la lah ban khur 5 wiket na ka bynta 33 run ha ki 10 over. Katba u Benedict Jones Makdoh (2/31 ha ki 8 over), Gaurav Narleng (1/2 ha ki 0.5 over) bad u Apandanka Marak (1/25 ha ki 7 over) ki la long kiwei pat ki nongpynhap wiket kiba kynsai na ka bynta ban pynlong ïa ka Nagaland ban shah pynkhyllem baroh ki nongtied bad kamai tang 167 run ha ki 39.5 over.
Na ka bynta ka Naga -land, u Shyerinlo bad u Amongti Longkumer ki la tied mar 36 run.
Haba wan beh ïa ka thong, ka Meghalaya ka la kynjoh 22/3 hashwa ba u Mewankitbok un ïasoh ha ka jingtied ryngkat bad u Angkit Tamang. Kine ki ar ngut ki la lah ban kynjoh sha ki 49 run na ka bynta ka wiket kaba saw hashwa ba u Mewan un shah pynkhyllem noh na ka bynta 34 run na ki 44 bol (4x4s, 2x6s).
Hadien u Angkit u la lah ban kynjoh sha ki 42 run na ki 67 bol (4x4s) ha kaba ka Meghalaya ka la nangjam ban kynjoh sha ka thong. Ha ka jingshisha ka Nagaland ka la don jingkyrmen ban kynjoh sha ka thong, hynrei u Rudra Singh Rathore (34 run not out na ki 27 bol, 4x4s, 1×6) u la lah ban pynthikna ïa ka Meghalaya ba kan kamai 170 run bad shah pynhap 7 wiket ha ki 29.4 over.
Lyngba kane ka jinglah ban ïalehkai bha ha ka jingtied bad kawang bol, u Mewan u la ïohpdiang syndon ïa ka nam Player of the Match.
