Shillong, Ïaïong 08
U Bah Sanbor Shullai uba dei u Myntri ka Sorkar Jylla bad ruh u Nongïalam ka BJP ha ka sngi Balang u la pyntip ba ki nongïalam ka BJP na Delhi kila ai ka jingmynjur ban pynïeng kyrtong ha ka ilekshon MP shiteng samoi na Shillong Lok Sabha, haba bynrap ba u long uba la khreh ban ïakhun lada ka seng ka rai ban ai tiket ïa u.
“Ka kaiphod na u State President bad ki nongtrei ka seng, la dep ban aiti sha ka High Command jong ka seng. Ka BJP na Delhi kala ai jingmynjur ba ngi hap ban ïakhun. Ka BJP kan hap ban ïakhun ïa ka ilekshon shiteng samoi na Shillong Lok Sabha,” ong u Bah Sanbor haba ïakren bad ki lad pathai khubor.
U Bah Sanbor u la ïathuh ba ka kam ban khot aplikeshon kam pat sdang ïa mynta hynrei na ki nongïalam na Delhi kila ai jingmynjur ïa u State President hynrei um pat khot satia ïa ka aplikeshon.
Haba kylli la u kloi ban ïakhun ïa kane ka ilekshon, u Bah Sanbor u la ong, “Nga dei u shipai ba kohnguh jong ka seng. Lada ka High Command lane ki Nongïalam ka Jylla ki bthah ïa nga ban ïakhun, kum u shipai ba kohnguh, ngan hap ban mih sha madan thma bad ïakhun”.
Haba pynkynmaw ïa ka jingpynïeng ïa u ha u 2019, u la ong, “Ha u snem 2019, khlem ka jingpoi pyrkhat ba lai taïew shuwa ka ilekshon MP, na ka ophis ka seng ha ka por 12 baje shiteng miet, kila phone ïa nga bad pyntip ba ka shithi kala wan poi na Delhi ba la pynïeng ïa nga kum u kyrtong na ka BJP ha u 2019. Kum u shipai ba kohnguh jong ka seng, ha ka sngi ba bud hi nga sdang mardor ban pynkhreh shaid shaid. Shu pyrkhat ma phi, tang hapoh lai taïew ka por ba nga ïoh ban ïaid ïalap ilekshon ha ki 36 tylli ki constituency”.
U Bah Sanbor u la ong, “Ha kane ka kynti ba mynta ngam tip satia ïano ba ka seng kan jied ban long kum u kyrtong.”
