Kum ki briew ngi kmen ngi sngewbha haba ngi ioh tei ïa ki park ne ki jaka jngoh kai. Ngi kmen haba ngi ioh shna ki ïingpaki ïingdulan bad kumjuh ngi kmen haba ngi ioh kyrhai ka spah ka phew ha ka jingim hangne ha pyrthei.
Hynrei baroh kine ki long tang kum ki umjer ki ban jah noh ha ki khyndiat por bad ki long tang ka jingpynlut kai ïa ka bym lah ban rah ne kit shano shano ruh. Ki shu pyut noh bad kylla rim noh tang ha ki katto katne snem. Haba ka jingim briew ruh ka kylla rim noh bad ngi hap ban jam ïa ka jinglong tymmen kaba long ka por kaba khadduh ïa ngi ki briew ban ioh shong hangne ha sla pyrthei. Namar ngim lah ban im sah ha kane ka pyrthei. Kumjuh ki mar ki mata ki jingdon jingem ruh kim lah ban neh sah ki jot noh bad ki kylla rim noh kum ka jing-long briew. Ka jingim briew ka sdang na ka jinglong khynnah ka jam sha ka jinglong samla bad na ka jinglong samla ka poi noh sha ka jinglong tymmen kaba long ka sngi kaba kut jong ka jingim ha kane ka pyrthei. To ngin kmen katba dang samla bad dang don ka por. Kane keiñ ki ong ka pyrthei ka ïingshong basa.
C. B. Iawphniaw
