Shillong, ïaïong 08
Ka kynhun ki nongtrei ka Meghalaya EMRI ka kyntu ïa ka Sorkar Jylla ban thungkam pura ïa ka jingshakri jong ka 108 Emergency Service bad ban pynsangeh ïa ka jingthmu ban ai tender biang ïa ka jingshakri sha ka kompeni shimet, da kaba kdew ba ki kompeni kim lah ban ai ka jingshakri kaba bit ba biang ha ki por ba la dep bad ha ka jingpeit jingkhmih ka National Health Mission (NHM).
Ha ka dorkhas ba la aiti sha u Myntri ka Koit ka Khiah u Bah Wailadmiki Shylla, ka Meghalaya EMRI Workers Union ka la ong, ba ka jingai jingshakri ka la ïaid mynta la 16 snem naduh u snem 2008 bad la shim ba ka long ka jingai jingshakri kaba kongsan tam ha ka ban shimkhia ïa ki jingjia kiba kyrkieh bad ki jingdonkam jong ki nongshong shnong.
Ka Union ka la pynpaw ka jingpyrshah kaba jur halor ka jingkhot tender biang ban ai jingshakri bad pynpaw, “Hadien ka jing bym lah treikam bha ka GVK Company, kaba la ïoh tender ban pynïaid ïa kane ka jingshakri, ki nongtrei bad ki nongshong shnong ki la pynlong ïa ki jingïakhih ha ki snem kiba la dep bad kaba la ktah jur ïa ki jingai jingshakri ba donkam kyrkieh ïa ki paidbah ha ka por ba ki mad ïa ki jingjia aksiden”.
Haba pynpaw ïa ki jingeh hapoh ka jingpynïaid jong ka GVK, ka Union ka la pynpaw “Ngi la sakhi ïa ki jingbym lah ka GVK ban ai ka jingshakri, naduh ka jingsumar ka jingbym don ïa ka jaka ban shna ne maramot, ka jingbym lah ban maramot ïa ki kali kit nongpang ne ‘Ambulance’ ha ka por, ka jingduna jong ka jingdon ki nongtrei, ka jingduna ha ka ban pynbiang ïa ki tiar sumar, ka jingbym buh lypa ïa ki tiar kiba donkam bad kiwei kiwei”.
Ki nongtrei ki la pynpaw pat ba naduh ba la pynïaid da ka NHM, ka rukom pynïaid ka la long kaba ïaid ryntih khlem kino-kino ki jingeh.
Ka Union ka la kynthoh namar ba ka jingai jingshakri ka long kaba la kyrshan da ka Sorkar, “Kumta ka long kaba biang ba ka Sorkar kan shimti hi ban pynïaid dalade” bad ka bynrap ba ka jingkhot tender ïa ki kompeni shimet “kan ïalam tang sha ka jingbamsap” bad “ka jingpynlong kum ka kam shimet.”
“Da kaba shim noh ïa ka jingpynïaid na ka Sorkar, ki paidbah kin sa shem jingeh namar ba ka Kompeni kan longtrai ïa ka jingshakri, ym ki paidbah ne ka Sorkar,” la pynpaw ha ka dorkhas.
Ki nongtrei ki la kyntu ïa ka Sorkar ba ka dei ban pynkut noh ïa ka jingkhot tender ïa kane ka jingai jingshakri kaba kongsan bad ban shim ïa ka jingtyrwa ban ithuh pura noh ïa kane ka jingai jingshakri jong ki nongtrei na ka bynta ka bha ka miat bad ka jingmyntoi jong ki briew hapoh ka Jylla.
Ka Union ka la pynpaw ruh ïa ka jingpyrshah kaba jur ïa ka Sorkar kaba la rai ban aiti lyngba ka Sub-Tender sha ka “Shishupal Agency” ban thungkam ha ka 108 Emergency Response Services bad ka la dawa ba dei ban thungkam bei- beit da ka Sorkar.
“Ngi pynpaw ïa ka jingpyrshah kaba jur halor ka jingïoh jingtip ïa ka jingthmu ban aiti ïa ka Sub-Tender sha ka ‘Shishupal Agency’ ban pynrungkam ïa ki nongtrei ha ki kyrdan ki bapher-bapher hapoh jong ka 108 Emergency Response Services.”
Ka Union ka ïengskhem halor ka jingïai dawa ba dei ban thungkam beit da ka Sorkar ne NHM. Ka Union ka la tyrwa “Ba ka Sorkar ne ka National Health Mission (NHM) ka dei ban pynlong ïa ka jingthungkam da kaba ai jingpynbna ïa ki paidbah ka Jylla ka ban pynthikna ba man la ki nongshong shnong kiba la bit la biang ha ka kyrdan kin ïoh lang ïa ka lad ban ai jingshakri ha ki kam kiba long kongsan tam”.
