Imphal, ïaïong:
Ka jingïakynad sa shisien ka la ktah biang ïa ka jylla Manipur naba ki la don arngut ki briew kiba la shah pynïap bad katto katne ngut kiwei pat ki la mynsaw ha ka por ba ki nongïakhih ki la hiar thma ïa ka ktem jong ki pulit ka tnat Central Reserve Police Force (CRPF) ha ka por janmiet jong ka sngi Ba-ar.
Ka jingïakynad, ka la mih hapdeng ki bor pahara bad ki nongïakhih, hadien ka jingshah pynïap jong 2 ngut ki heprit uba dang san snem bad ka para jong u, kaba dang hynriew bnai, kiba dang thiah ha ka ïing jong ki, ha ka por ba ka ïing jong ki ka la shah thombor ha ki lehnoh ha Bishnupur distrik.
Ka jinglong jingman ka dang shah ktah jur ha ka sngi Balang, hynrei kam shym don shuh kano kano ka jingjia ka ban mih biang haduh ba la thoh ïa ka khubor. Ka sorkar Manipur, ka la pynsangeh treikam ïa ka internet bad ka mobile data, kaba kynthup ïa ka Broadband, VSATs bad ka VPN, ha ki san tylli ki distrik kiba don ha ki jaka them na ka bynta lai sngi lynter.
Arngut ki khynnah rit ki la ïap bad ka kmie jong ki ka la mynsaw hadien ba ki suba lehnoh ki la thombor da ki ‘namding ïa ka ïingsah jong ki riew paidbah ha ka distrik Bishnupur jong ka Manipur ha ka por mynstep jong ka sngi Ba-ar.
Katkum ka jingïathuh ki heh sorkar, kane ka jingjia ka la jia ha ka por 1 baje mynstep ha ka thaiñ Moirang Tronglaobi ha kaba la pynbthei ïa u bom ha kawei ka ïing katba katei ka longïing ka dang thiah.
Katei ka jingbthei ka la shim ïa ka jingim jong uwei u khynnah shynrang ba dang san snem bad kawei ka khynnah kynthei ba dang hynriew bnai eiei.
Kane ka briew kaba la mynsaw la ngeit ba ka dei ka kmie jong kine ki heprit, ha kaba la pynkit mar mar ïa ka sha ka jaka ai jingsumar kaba don ha marjan ka jaka ba la jia ka jingjia.
U Myntri Rangbah u la ong ba kane ka kam thombor ka dei ka kam riewkhlaw bad ka jingthombor beiñ ïa ka longbriew manbriew bad ka jingthombor kaba pyrshang beit ban wanrah ki kynrum kynram bad ki jingpynthut ïa ka shongsuk shongsaiñ ha Manipur”.
“Nga pynrem ïa ka da ki kyntien kiba tyngeh tam. Wat ym don jingartatien, ïa kiba donkti yn ithuh, yn thwet, bad yn sa leh tyngeh ïa ki katkum ka aiñ. Ïa kum kine ki kam pyntieng yn ym shah ha kano kano ka jinglong jingman,” u la ong.
U Myntri Rangbah u la pynskhem ba ka sorkar jylla ka ïeng skhem ban ïada ïa uwei pa uwei u nongshong shnong bad kan shim ïa ki lad ki lynti ban pynthikna ba ka jingsuk, ka shongsuk shongsaiñ, bad ka jingshngaiñ kan ym shah ktah.
U la kyntu ruh ïa ki paidbah ba kin long kiba ïatylli bad kiba skhem pyrshah ïa kito kiba wad ban pynthut ïa ka jingïatylli lang. Ki nongshong shnong ki la pynlong ïa ka jingïakhih hynnin ka step bad ki la thang ar tylli ki kali kit umphniang bad kawei ka trok hajan kawei ka petrol pump ha katei ka thaiñ.
Ki la thang ïa ki shaka kali ha khmat ka Moirang Police Station bad pynpra ïa kawei ka ktem pulit ba la shna shipor.
La pynjari ïa ki bor pahara ha katei ka jaka ban tehlakam ïa ka jinglong jingman.
