Nongpoh, Ïaïong 08
Ka jingmih khubor ha kine ki khyndiat sngi halor ka phang ba u Bah Mayralborn Syiem, MLA ka UDP na Nongpoh Konstitwensi u lah ban ïakhun ïa ka ilekshon MLA ha u snem 2028 na ka tiket jong ka National People’s Party (NPP), kala pynlong ïa ka NPP Nongpoh Block ban mih shakhmat ban pynshai ba ki khlem pat ïoh jingtip eiei satia halor kane ka kam.
Katkum ka kyrwoh ba la soi da u Bah Henry Nongrum bad u Bah Bishar Timung kiba dei President bad Secretary jong ka NPP Nongpoh Block, la ïathuh ba ka Block Committee kumba long haduh mynta kam shym pat la ïakren satia ïa ka tiket MLA ne ka ilekshon kaban sa wan, hynrei ka dang ïaleh kumno ban dang pynkhlaiñ shuh shuh ïa ka seng ha baroh ki bynta jong ka konstitwensi.
Ki la ong ruh kumba na ka liang ka Block Committee naduh ki nongïalam, ki dkhot bad paidbah nongkyrshan kila trei shitom met bad mynsiem bad pynjop ïa ka Kong Rona Khymdeit ha ka ilekshon MDC 2025 kaba la dep, ki kyrmen skhem ba ka NPP Meghalaya State Unit kan sngap bad sngew ïa ka jingkyrpad jong ka NPP Nongpoh Block.
