New Delhi, Iaiong:
U Myntri ka tnat kam bar ri jong ka Iran, u Seyed Abbas Araghchi, ha ka jingkren jong u ha ka rynsan ‘Social Media’ u la pyntikna ia ka jingsangeh thma ha Middle East kaba 2 taiew, ha kaba u la iaroh ia ka jinglah jong ki nongialam ka Pakistan, u Myntri Rangbahduh Shehbaz Sharif bad u Asim Munir, halor ka jingtrei shitom jongki ban wanrah ia ka jingiakren sangeh thma hapdeng ka US- Israel bad ka Iran.
Kham hadien, u Myntri Rangbahduh jong ka Pakistan, u Shehbaz Sharif, u la ong ha ka jingkren jong u hapoh ka rynsan X, “Da ka jingsngewrit kaba khraw tam, nga sngewkmen ban pynbna ba ka Islamic Republic of Iran bad ka United States of America, ryngkat bad ki paralok jong ki, ki la mynjur ban sangeh thma mardor ha man la ki jaka, kynthup ia ka Lebanon bad sha kiwei pat ki jaka, ka ban treikam mardor.”
“Nga pdiang sngewbha ia ka jingleh stad bad nga pynpaw ia ka jingsngewnguh kaba khraw ia ki nongialam jong baroh ar tylli ki ri bad khot sngewbha ia ki kynhun jong ki sha Islamabad ha ka Sngi Thohdieng, 10th u Iaiong 2026, ban ia kren shuh shuh na ka bynta ka jingiateh kaba kut ban pynbeit ia baroh ki jingiakynad,” u la bynrap. “Ngi kyrmen skhem, ba ka ‘Iakren Islamabad’ kan jop ban ioh ia ka jingsuk kaba neh bad ngi kwah ban iasam shuh shuh ia ki khubor babha ha ki sngi ban wan,” la ong u Sharif.
Ka CBS News, ka iathuh ba U President Trump, ula iakren bad U Benjamin Netanyahu, myntri rangbah duh jong ka Israel, bad U Field Marshal Munir, jong ka Pakistan, shwa ban pynkut ia katei ka jingsangeh iasiat kaba ar taiew. Kat kum ki khubor, u Field Marshal Munir, u la ïakynduh “baroh shi miet” bad u Vice President jong ka US, u JD Vance, u nonglam khubor ba kyrpang, u Steve Witkoff, bad u Myntri kam bar ri jong ka Iran, u Araqchi.
Hynrei ka jinglong rangbah jong ka Islamabad, ka la shah pynthut ha ka jingbakla ha ki social media. Ka jingthoh jong u Sharif kaba kham mynshwa, ha kaba u la kyrpad ïa u Trump ban pynjlan ïa ka por ba la buh jong u ban ailad ïa ka kam khaïi ban ïaid la ka jong ka lynti, khlem da thmu la thoh da u lain ha trai: “Draft – Ka khubor jong u PM jong ka Pakistan halor ka X.” La weng noh ïa ka ha ka jingpynkylla kaba hadien, hynrei ki screenshot jong ka histori jong ka jingpynkylla ki la saphriang ryngkat bad ki jingkynnoh ba u Myntri Rangbahduh jong ka Pakistan u la “ot bad pyndait” ïa ka khubor ba la phah da ka White House.
