Shillong, Ïaïong 09
Ka All Jaiñtia Muster Roll Workers and Labour Union ha ka sngi Palei jong ka taïew ka la leit ban ïakynduh bad u Myntri Rangbah ka Jylla u Conrad K Sangma ban ïakren haba ïadei bad ka jingdawa jong ki kaba la sahteng haduh kine ki sngi.
Ha kane ka sngi ki nongtrei Muster Roll ki la thmu ban pynlong ïa ka jingïakhih paidbah ha Motphran bad dawa na ka Sorkar hynrei ki la pynsangeh noh shuwa hadien ba u Myntri Rangbah u la khot ïa ki ban ïakren.
Haba kren sha ki lad pathai khubor u Bah Khroo L Pariat nongaiktien ka kynhun u la ong ba na ka liang u Myntri Rangbah un da khmih bniah shuwa halor kine ki mat jingdawa jong ki, da kaba ai por ïa ka Sorkar haduh ban da kut u Ïaïong 2026 ban pyntreikam bad pynurlong ïa ki mat jingdawa bad lada jia ba ka pulom, ki la pynbna ban pynlong da ka jingïakhih ha baroh ki District Headquarter jong ka Meghalaya.
U Bah Khroo L Pariat ula ïathuh ba na ka liang u Myntri Rangbah u la kular ban pynbeit ryntih noh bad pynthikna ba baroh ki tnad Sorkar kin pyntreikam ïa ka hukum ban pynbeit thymmai ïa ka Variable Dearness Allowance (VDA) arsien ha ka shi snem.
U Bah Khroo ula ong “Ka jingïalang bad u Myntri Rangbah ka la long kaba biang bha. U la pynthikna ïa ngi ba yn sa pynbeit ryntih ïa baroh ki tnad hapoh jong ka Sorkar Meghalaya ban bud ïa ki jingbthah jong ka Sorkar. U la kubur ruh ba ka la don ka jingduna bad ka jingbym biang ka rukom treikam hynrei mynta un sa pynthikna noh ba ki khlieh jong baroh ki tnad kin hap ban bud ryntih ïa man la kawei pa kawei ka jingbthah kaba pynmih”.
Ula ïathuh ba ka Union ka la ïai dawa ba dei ban pyntreikam ïa ka jingpynbeit thymmai noh ïa ka VDA, kaba la pynkup bor da ka Minimum Wages Act kaba dei ban pynkylla arsien ha ka shi snem ha ka 1 tarik u Ïaïong bad 1 tarik u Risaw.
“U Myntri Rangbah u la pynthikna ba yn sa pynmih ïa ka hukum ban pynbeit thymmai ïa ka VDA ha kine ki sngi ban wan” u la ong.
Shuh shuh u la ong ba u Myntri Rangbah u la mynjur ruh ban khmih bniah ïa ka mat kaba dei bad ka jingshongthait na ka kam namar ba ka dei ka mat kaba pynmih ïa ka jingbym shai ne pynkulmar. U la bthah ha ki ophisar ban buddien ïa kane ka mat jingdawa bad yn sa lum ïa ka jingïalang hashuwa ban kut u Ïaïong.
“Ngi ngin ïai ap shuwa ïa ka jingpyntreikam ïa katei ka jingdawa hapoh jong une u bnai. Lada u Myntri Rangbah um pyntreikam ïa ka, ngin pynlong ïa ka jingïakhih kaba heh” la maham u Bah Khroo L Pariat.
