Shillong, Ïaïong 09
Ka Meghalaya Motor-sports Society ha ryngkat ka jingïasnoh kti lang bad ka Godspeed Racing na Pune, kin pynlong ïa ka ïakob ñiah thuk thuk ba la tip kum ka “MRF MO-GRIP Supercross FMSCI National Championship” lashai ka sngi Saitjaiñ ha madan Kurkalang, Ri Bhoi District.
Kane ka long ka wat kaba nyngkong eh ban sdang ïa kane ka jingïa-kob na kane ka nongbah bad hadien pat yn sa lah ban pynlong sa ha kiwei ki Jylla bapher bapher ka ri India.
Ha kane ka jingïakob kin don haduh 141 ngut ki nongñiah thuk thuk ki ban wan ïashim bynta na kylleng jong ka ri India, kynthup ruh ïa 40 ngut kiba na ka jylla Meghalaya bad yn ailad ruh ïa kiba dangkham khynnah ha kane ka jingïakop.
Ka President jong ka Meghalaya Motorsports Society ka Kong Phoebe Dale Nongrum ka la pynpaw ba ka jingpynlong ïa kane ka jingïakop hapoh ka Jylla ka long shi bynta ban plie lad ïa ki nongñiah thuk thuk na kane ka Jylla ba kin ïoh ban pyni ïa ki sap jong ki.
Kaba kham sngewtynnad ka long ba u nongñiah thuk thuk ba paw ka Jylla u Banteilang Jyrwa un ïashim bynta ha kane ka jingïakop. U Banteilang u dei ruh uba la khur jingjop ïa ka Class 4 – 2025 Indian Expert Champion 2025 ha ka Indian National Super -cross Championship, bad u la jop arsien ïa ka Indian Open & Indian Expert ha ka FMSCI Indian National Motocross Championship.
Ha kawei pat ka liang u Shyam Kothari uba la wan mihkhmat na ka Godspeed Racing bad uba long ruh u nongkyntiew ïa kane ka jingïakob ñiah thuk thuk, u la pynpaw ba kane ka jingïakop ka long kaba biang bha ka ban plie lad ïa ki nongshim bynta ban pynpaw ïa ki sap ki jong ki. “Kumba ka jinglong jingman ka mariang ha kane ka jaka ka long kaba biang ha kaba ki nongshim bynta kin ïoh ban ïashim bynta ha ki jaka ba long ktieh ban pynpaw ïa ki sap jong ki.”
U Kothari ula pynpaw ruh ïa ka jingdonkam ban don ki jaka ba kyrpang ban ïalehkai ñiah thuk thuk ha kane ka nongbah namar ha kiwei ki jaka kum ha Bangalore ki don ïa ki jaka ba kyrpang. “Te kumta nga kyntu ïa ka Sorkar Meghalaya ba kan ïarap ban pynbiang lem ïa kum kitei ki jaka ïalehkai ñiah thuk thuk khnang ba ki khynnah ki samla kiba don ïa kum kine ki sap ñiah thuk thuk kin ym leit sha ki surok kali.”
