Shillong, Ïaïong 09
Ka Green-Tech Founda-tion (GTF) hapoh ka jingïalam u Bah H.Ban-siewdor Nonglang, Chair -man, ha ka sngi Palei jong ka taïew, ki la mih bad leit tur hakhmat khyrdop Secretariat, ban pynlong ïa ka jingïakhih bad pynbna ban shongshah thngan khlem buh por halor ka jingthmu ban ai ka Sorkar ban shna ki jingtei ha dewlynnong Lumpongdeng, Umïam.
Ka GTF ka la dawa ba ka Sorkar ka dei ban weng shi syndon ban ai jaka ha Lumpongdeng, Umïam sha ki kompeni ban shna ïa ki jingtei.
Ha kane ka sngi, nalor u Bah H.Bansiewdor la don lang ruh ar ngut kiba dei ki nongïalam ka kynhun ban pyrshah ïa ka Sorkar Jylla halor katei ka mat.
Ki nongïalam ka GTF ki la wanrah ruh da ki plakad bad rah shakhmat ka Secretariat kum ka dak ban pynrem ïa ka jingleh ka Sorkar ban ai ka jaka ha Lumpongdeng ha ki kompeni ban tei ïa ki jingtei ba bun ha katei ka jaka bad kaba lah ruh ban ktah ïa ka mariang hi baroh kawei.
Ha ka jingpyrshang ki nongïalam ka GTF ban pynlong ka jingïakhih hynrei la wan ban khang noh da ki pulit da kaba khang shisyndon ban nym shah ban wan ïakhih hakhmat Secretariat namar ba ka dei ka jaka kaba la pynjari kyndon da ka DC. Watla katta ruh ki la pynpaw ka jingpyrshah kaba jur da kaba ong ba kin shong beit ha katei ka jaka bad ban shongshah thngan ruh haduh ba ka Sorkar kan sngap ïa ka jingdawa jong ki.
Ki bor pulit mar mar ki la rah noh ïa kine ki nongïalam da ka bos bad rah sha thanad Sadar halor ka jingleit ïakhih hakhmat Secretariat.
U Bah HB Nonglang Chairman ka GTF haba kren sha ki lad pathai khubor u la ong ba ka jingïakhih ka long kaba jar-jar namar ba kim kwah ban pynthut ïano-ïano bad ka jingïakhih shah thngan khlem buh por ka long tad haduh ba ka Sorkar kan weng ban ai ïa katei ka jaka sha ki kompeni ban tei jingtei.
U la ïathuh ba ïa ki dieng ha u dewlynnong Lumpongdeng la sdang ban pynkhyllem, da kaba ong ruh ba ka Sorkar ka la thok pylleiñ ïa ki paidbah lyngba ka jingkren jong ki.
U Bah HB Nonglang u la buh ruh ka jingkylli ïa ka jingkam ki bor Sorkar ba ki nongïakhih ki la pynthud ïa ka leit ka wan ki kali bad ong ba kumno ki lah ban kynnoh ba ki la pynthut ïa ka jingïaid kali?.
“Ngim pyrshah ïa ka projek hynrei ngi ong ban pynlait ïa ka dewlynnong Lumpongdeng na ka projek namar ka dei kaba don hapdeng eh jong ka pung Umïam bad kumno phin rah ïa ki kor ba khia bad pynjot ïa ka dewlynnong Lumpongdeng,” u la bynrap.
Kumta ki la kren da kaba shai ba kin ïakhih da kaba shah thngan haduh ba ka Sorkar kan ai da ka jingthoh ban wengnoh ïa katei ka kam ban tei ïa kita ki jingtei ha katei ka dewlynnong Lumpongdeng.
