Shillong, Ïaïong 09
Ka Rajasthan United kaba la don ha ka kyrdan ba-ar ha ka lympung ïalehkai Indian Football League (IFL), ka la don hapdeng ka jingeh ha kaba ka lah ban shah daiñ kuna lada kam lah ban ïoh jaka ïalehkai kaba thymmai ka ban don ïa ki ‘flood light’ naduh 19 tarik mynta u bnai.
Na ka liang ki bor pynïaid kane ka klob ki la pynkhreh ban leit ïakynduh ïa ki bor sorkar na ka bynta ban kyrpad ban pynïoh jaka ïalehkai da kawei pat.
Kumba ka paw ka Rajasthan United ka la ïalehkai ha la ïing ha Vidyadhar Nagar Stadium kaba ha Jaipur, ha kaba la tei da ka Rajasthan State Sports Council bad ka Jaipur Development Authority. Hynrei ha kane ka jaka ym pat shym la pyndait ïa ki ‘floodlight.
Ha ka shithi sha baroh ki klob jong ka IFL, ka AIFF ka la kyntu ïa baroh ki klob ba kin bud katkum ki kyndon jong ka jingpynïaid ïew na ka bynta ki jingïalehkai.
Kat kum katei ka shithi ka la kdew shai ba naduh ka 19 tarik u Ïaïong, baroh ki jingïalehkai ki dei ban pynlong ha ka por 6:30 janmiet.
“Kumba baroh ki prokram ïalehkai ki ban wan kin long hadien ba la sep ka sngi, te kumta dei ban pynbiang ïa ki jingshai lyngba ki ‘floodlight’ ha baroh ki jaka ïalehkai bad ïa kane ym lah ban ai jingbit ba kin leh da kumwei,” la ong ha katei ka shithi.
Shuh shuh ka AIFF ka la kyntu ïa baroh ki klob ba kin hap ban wad da kiwei pat ki jaka ïalehkai namar ym lah ban pynlong ïa ki jingïalehkai ha ki por ba dangshai. Ka la ong ruh ba lada jia ba ka kynhun kaba pynlong ïa ka jingïalehkai ha la ïing kam lah ban pynlong ha ki stadium kiba don ïa ki ‘floodlight’, kin shah daiñ kuna haduh T. 9 lak na ka bynta kawei ka jingïalehkai.
Kumba ka paw ka Rajasthan ka la don ha ka kyrdan ba-ar ha katei ka lympung ha kaba ka la duna da 2 poiñ ïa ka Diamond Harbour, kaba bat ïa ka kyrdan ba hakhlieh.
