Jaipur, ïaïong:
Ki la don kumba 5 ngut ki khynnah, kynthup ïa ki arngut shipara, kiba la ïap hapoh ki san sngi, hadien ba ki la shah ktah ha ka jingshitom kaba khyllah bad kine ki dei na Salumber distrik jong ka Rajasthan, la ïathuh ki heh ba dei khmih ha ka sngi Balang.
Kine ki khynnah kiba la khlad, ki don hapdeng ka rta kaba ar bad saw snem, la ïathuh ba ki la ïoh ïa ka jingpang kaba don ïa ki dak ki shin; kum ka jingshit bad prie bad ki la khlad noh tang hapoh 24 kynta, ong ki heh ba dei khmih.
Ïa kane ka jingjia, la ïoh jingtip ba ka la jia ha ka shnong Lalpura bad Ghata, kaba hap ha Lasadiya Sub-division, ha kaba ki kynhun jong ka tnat ka koit ka khiah, ki la phah ban shim ïa ki nongmuna bad ban buddien ïa ka jinglong jingman.
Ki ophisar, ki la pynithuh ïa kiba la khlad, kum u Deepak (4), u para jong u u Laxman (3), bad ka Seema (4) na ka shnong Lalpura bad u Rahul (4) bad ka Kajal (2) na ka shnong Ghata.
Ki dang don sa 8 ngut kiwei pat ki khynnah kiba dang shah sumar mynta ha ki hospital ha Salumber bad Udaipur, la ïathuh ki heh ba dei khmih.
U Additional District Magistrate u Dinesh Rai Sapela u la ong ba la pynlong ïa ka jingpeit bniah ïa ki nongshong shnong ha ki shnong kiba la shah ktah, kiba don palat 560 tylli ki longïing.
“Ki kynhun sumar ki la pynlong ïa ka jingpeit bniah bad kino kino ki briew kiba pyni ïa ki dak jingpang kin ïoh ïa ka jingsumar,” u la ong da kaba kyntu ïa ki nongshong shnong ba kin leit mardor sha ki jaka sumar ba jan tam lada ki khynnah ki pyni ïa ki dak ki shin jong ka jingpang.
U Chief Medical and Health Officer u Mahendra Parmar u la ïathuh ba la dep phah ïa ki nongmuna sha RNT Medical College ban test, bad ïa ka daw ba thikna jong kane ka jingpang yn sa tip tang hadien ba la ïoh ïa ka kaiphod.
Kum ka lad jingïada, ki kynhun na ka tnad ri mrad ki la synreit ruh ïa ki dawai pynïap khñiang ha ki jaka ri masi ha ka shnong Ghata.
