Mawkyrwat, Ïaïong 09
Ki Khun ki hajar ka Hima Langrin ki la pynpaw ïa ka jinglyngngoh kaba khraw halor ka jingweng noh kyndit kynsan ïa u Bah Bryllyen Henry Syiemiong kum u Acting Syiem ka Hima Langrin.
U Bah Bryllyen Henry Syiemiong, Acting Syiem uba dang shu shah weng ha ka Khasi Hills Autonomous District Council (KHADC) haba kren sha ki lad pathai khubor u la ïathuh ba ka District Council ka la weng jubor ïa u khlem kano kano ka jingpyntip.
U la ïathuh ruh ba ka por ba ka hima ka dang don hapdeng ka jingpynkhreh pynkhrum ïa ka jingai wai ïa ka ïew ka hat bad ki mar jong ka hima sha ki khun ki hajar lyngba ka jingthep tender kaba ka District Council hi ka la buh ïa ka tarik kata ha ka 9 tarik u Ïaïong, 2026 hynrei kyndit kynsan ha ka por mynstep jong katei ka sngi, u la ïoh pdiang pynban ïa ka shithi na ka District Council kaba la pynsangeh noh ïa ka jingtreikam jong u kum u Acting Syiem bad la thung bujli da u Bah Pynshngainlang Syiemiong.
Shuh shuh u la ïathuh ruh ba ka jingleh jong ka District Council ka la pynlyngngoh ïa ki khun ki hajar ka Hima Langrin namar ha kane kajuh ka sngi ka la pynkynriah ruh ïa ka jingai wai mar hima ha kaba ki khun ki hajar ki la wan na kylleng ki shnong bapher-bapher bad ki la shu pynlut kai ïa ka sngi jong ki bad u la ïathuh ruh ka jingpynkynriah ïa ka tarik ai wai mar hima ka la long haduh lai sien.
Ha kaba ïadei bad kane, ki khun ki hajar ka Hima Langrin ki la pynrem jur ïa ka jingleh donbor jong ka District Council kaba la ïuhroit bad thombor ïa ka iktiar jong ka hima.
U Bah Bryllyen Henry Syiemiong u la buh jingkylli ïa ka KHADC kaba la lamkhmat da ka VPP bad kaba kam ïalade ba ka dei ka seng kaba synshar hok, hynrei lyngba ki kam jong ka, ka paw ba ka jingkam ka long kaba lamler bad u la kynthoh jur ruh ba ka Executive Committee (EC) hapoh ka jingïalam ka VPP ka dei kaba sniew tam ha ka histori jong ka KHADC, kaba ïalam bakla ïa u paidbah bad pynjot pynpra ïa ki shnong ki thaw bad ki Hima, ong u Bah Bryllyen Henry.
