Shillong, Ïaïong 09
Ka Voice of the People Party (VPP) Youth Wing hapoh ka jingïalam u Bah Marbud Dkhar, President, u la ong ba ka jingwanrah ka Sorkar NPP ïa ki kompeni heh spah kiba dei nabar, ka dei ka buit tang ban kamai spah na ka ri jong ngi.
Ïa kane u Bah Marbud u la pynpaw haba kren sha ki lad pathai khubor ha ka jingwan ai jingkyrshan ba pura ïa ka jingïakhih ka Green-Tech Foundation ha khyrdop Secretariat halor ka jingthmu shna 5 star hotel ha Umiam.
U Bah Marbud u la ong ba ka party VPP ha u snem 2024 ka la phah ka jingthoh sha ka Sorkar halor ka jingaiti ïa ka jaka ba 66 akar ha Umïam sha ki kompeni heh spah bad kum ka party ruh ka ïengskhem ban ïada ïa ki jaka ki puta bad ïa ka Mariang.
Dei halor kane ka nongrim ba ka party VPP Youth Wing ka wan ban ai ka jingkyrshan ïa ka jingïakhih ka Green-Tech Foundation, u la ong.
“Hato kane ka dei ka Sorkar jong ka Jylla Meghalaya ne ka dei ka Sorkar jong ka National Party. Ka jingwanrah ka Sorkar ïa kine ki kompeni heh spah ka dei bad ki kompani kiba nabar, ka dei ka buit ban kamai spah na ka ri baieit jong ngi ban myntoi ka party,” la bynrap u Bah Marbud.
U la ong ruh ba kita ki 5 Star hotel ki la don bun ha ka Jylla bad lada wanrah shi wanrah ïa kine ki 5 Star hotel kiba ïohnong dei tang ki heh spah hynrei ki paidbah kin duh nong.
