Srinagar, ïaïong:
Ki shipai ka tnat Indian Army ki la lah ban khanglad ïa ka jingjia basngewsih ha kaba ki la lah ban pynduhbor ïa u bom IED, uba la thep da ki tiar pynbthei plastik ryngkat bad u Primer, u Detonator Electric, u Remote Trigger, bad ki Battery, ïa uba la tep harud surok ha ki kper soh hajan Zainapora. Ka lah ban long ba la thmu ban thombor ïa ki kali jong ki bor pahara ha South Kashmir.
Ha ka jingkhynra kaba stet, ki shipai kiba la pynkhreh bha jong ki 44 Rashtriya Rifles (RR) ki la pynduh pyndam ïa ka jingthmu jong ki lehnoh kaba ma da kaba ki la ïoh kurup bad pynduh bor ïa u bom ba khlaiñ bor uba heh 14.3 kg ha shilynter ka surok Zainapora-Chattergam ha South Kashmir ha ka step jong ka sngi Balang.
Ka lah ban long ba la thmu ban pynbthei pyrshah ïa ki kali jong ki bor pahara ha South Kashmir, ong ki lad khubor. Ha ki por ba pynlong ïa ka jingpyntreikam kaba man ka por, ka kynhun RR ka la ïohi ïa katei ka tiar kaba suba bad ka la khot ïa ki kynhun pynduh bor ïa ki bom, kiba la pynduh pyndam ïa katei ka tiar da kaba suk, da kaba lait na ka jingjia ba sngewsih kaba lah ban jia.
“Ka jingjia kaba khraw da ki lehnoh ban pynthut ïa ka jingsuk ha katei ka thaiñ la lah ban khanglad,” la ong u nongaiktien jong ki shipai, da kaba pynpaw ïa ka jingpeitngor jong ki shipai.
Ka jingkoit jingkhiah ka pyni ïa ka jingbyrngem kaba dang ïai bteng na ki lehnoh kiba pyrshang ban pynthut ïa ka jinglong jingman ha ka Valley shwa ka aïom jngohkai pyrthei ha ka por Lyiur.
Kum ka jubab, ka RR, ki pulit ka Jammu bad Kashmir, bad ki CRPF ki la pynjur ïa ka jingtreilang ban wad ïa kito kiba donkti ha katei ka jingpyrshang kaba la pulom. Ka jingtalasi ka dang bteng ha ki kper soh bad ki shnong ba marjan.
Kane ka jingjia ka bud ïa ka rukom jong ki jingbyrngem buh bom IED ba dang shen ha North Kashmir, ha kaba ki bor pahara ki la ïoh ban khanglad bunsien ïa ki jingthmu kiba kum kine lyngba ki lad jingïada.
