Shillong, Ïaïong 09
Ka National People’s Party (NPP) kala pynpaw ba kam don jingkwah satia ban don kano-kano ka jingïatreilang bad kiwei ki seng saiñpyrthei ha ka ilekshon MP shiteng samoi na Shillong Lok Sabha. Haduh mynta, kam pat shim rai halor u ne ka kyrtong na ka bynta kane ka ilekshon.
“Phi la ïohi ïa ka saiñpyrthei ha Meghalaya, ngim don ïa kano-kano ka jingïatreilang bad kiwei ki seng saiñpyrthei ha ka ilekshon. Haduh mynta, ngim pat shim rai halor u kyrtong na ka bynta kane ka ilekshon,” ong u Working President ka NPP bad Myntri Sorkar u Marcuise N Marak haba ïakren bad ki lad pathai khubor ha ka sngi Palei.
Ha kaba ïadei bad ka jingjied ïa u kyrtong Rajya Sabha, u Marcuise u la ong “Shen, ngin sa shim ïa ka rai bad ïano ban pynïeng, ngin sa rai”.
Haba phai pat sha ka ilekshon jong ka Garo Hills Autonomous District Council (GHADC), u Marcuise u la ong, ka Sorkar kala pynjlan ïa kane ka ïingdorbar ba mynta sa hynriew bnai, kaba ailad ban shim ïa ki sienjam ba donkam ban hap leh hashuwa ban pynlong ïa ka ilekshon.
Haba kylli halor ka ilekshon ha Assam, u Marcuise u pynpaw ba ka NPP ka kyrmen skhem ba kan lah ban plie account ha kane ka Jylla ba marjan.
