Shillong, Ïaïong 09
U Myntri Rangbah ka Jylla u Conrad K Sangma ha ka sngi Palei, u la pynshai ba ka Sorkar Jylla kala khang ban shna ïa kino-kino ki jingtei kiba neh shirta ne ‘Permanent Construction’ ha dewlynnong Lum-pongdeng.
Kane ka jingpynshai jong u Myntri Rangbah kala wan hadien ba kala don ka jingïakhih da kaba shah thngan ba la pynlong da ki nongïalam jong ka Green-Tech Foundation habar khyrdop jong ka Secretariat kiba la dawa ba ym dei ban leh ïa kino-kino ki projek jong ka kam jngohkai ha dewlynnong Lumpongdeng.
“Nga kwah ban shim ïa kane ka kabu ban pynshai sha baroh ba ha ka jingïateh soskular kaba la dep ban ïasoi, ka Sorkar bad ka tnad jngohkai kala dep ban kren shai ba kan ym don kano-kano ka jingtei kaban neh pura ha katei ka dewlynnong,” ong u Conrad.
Ha kaba ïadei bad ki jingsngewkhia ba katei ka dewlynnong kan shah pynkylla noh kum ka jingtei maw, u Myntri Rangbah u la ong, “Ka jingsngewkhia kaba don ba katei ka dewlynnong baroh kawei yn pynkylla long noh da ki jingtei da ki maw ka long kaba bakla. Ka Sorkar kala dep ban kren shai ha ka jingïateh soskular ba ym dei ban don kano-kano ka jingtei kaba neh pura kaba yn shah ban leh hapoh katei ka dewlynnong”.
U Conrad u la batai ba tang ki jingtei kiba shipor ym ki ban neh shi rta ïa kiba yn shah ban pynitynnad ïa katei ka jaka.
“Ki jingtei kiba shipor, Shamianas, Pandal bad ki dukan kiba shipor, kiba lah ban pynpra noh shisien ba la kut ne dep ka prokram kumba ngi leh ha Ward’s Lake… kiban neh tang ha ka shi taïew ne shiphew sngi bad yn sa weng noh ïa ki,” u la ong.
“Kumta kan ym don kano-kano ka jingktah ïa ka dewlynnong ne ïa ka jinglong jingman jong ka jingdon jingem ki jingthung bad ki jait jingim ha katei ka jaka,” u la ong.
U Conrad u la bynrap ba watla ki aiñ ki kanun kiba ïadei bad ka mariang kila shah ban tei ïa ki jingtei ha ki katto katne ki bynta ha kaba la ïoh ïa ka jingbit na ka tnad Forest, hynrei ka tnad Tourism kala ïengskhem ha la ka nongrim.
“Nga kyrmen skhem ba kane ka jingpynshai ka barit, ïa ka jingsngewkhia jong ki nongshong shnong yn sa shimkhia,” u la bynrap.
