Guwahati, ïaïong:
Ki la don palat 25 million ngut ki nongthep vote kiba ïoh ïa ka hok ban thep vote ïa ki 722 ngut ki kyrtong ba kynthup ïa 59 ngut ki kynthei ha ka jingïakhun.
U Myntri Rangbah ka jylla u Himanta Biswa Sarma u ïakhun ïa kane ka elekshon na Jalukbari, u heh jong ka seng Congress ha ka jylla u Gaurav Gogoi na Jorhat, u nongïalam ka All India United Democratic Front u Badruddin Ajmal na Binnakandi bad u heh ka Raijor Dal u Akhil Gogoi na Sibsagar.
Napdeng ki nongthep vote, 6,42,314 ngut ki dei ha ka rta kaba 18-19 snem, 2,50,006 ngut ki dei kiba la palat ïa ka 80 snem, bad 2,05,085 ngut ki dei ki briew kiba don jingduna ha ki dkhot met. Haduh 26,032 ngut ki briew kiba la palat ïa ka 85 snem, bad 8,373 ngut ki briew kiba don jingduna ha ki dkhot met ki la thep vote lyngba ki postal ballot.
U Myntri Rangbahduh u Narendra Modi u la kyrpad ïa ki paidbah ka Assam ba kin ïashim bynta bun ha ka jingleit thep vote.
“Nga kyrmen ba ki samla bad ki kynthei nongthep vote jong ka jylla kin ïashim bynta da ka jingkmen bad pynlong ïa kane ka elekshon kum ka jingrakhe ïa ka synshar paidbah bad ka kamram paidbah,” u la ong ha ka rynsan X.
U Myntri Rangbah ka Assam u Himanta Biswa Sarma u la ong ba kawei pa kawei ka sur, kawei pa kawei ka vote ka long kaba kongsan ha ka lynti ban tei ïa ka Assam kaba kham bha bad kyntu ïa ka jingthep vote da kaba bun ban pynkhlaiñ ïa ka synshar paidbah bad ban rah ïa ka Assam sha ki kyrdan kiba thymmai.
U Mallikarjun Kharge u heh jong ka seng Congress u la ong ba kane ka jingkylla ka long kaba lah ban ïohsngew ha Assam.
“Ha kine ki 10 snem ba la leit noh, la thmu ban pyntlot ïa ka jingïatylli jong ka Assam; ka imlang sahlang jong ka ka la nang jynjar, la pyndonkam bakla ïa ki marpoh khyndew jong ka, bad ki jingïathuhkhana lamler la saphriang na ka bynta ka jingmyntoi ha ka saiñ hima sima.”
U la bynrap ruh ba ka la dei ka por ba ki paidbah ka Assam kin ïatylli lang bad ban jop ïa ka politik jong ka jingïapait, ka jingshah kyntait, bad ka jingbym shimkhia da ka bor jong ka vote jong ki. “Jied ïa ka lynti jong ka jingïatylli, ka jingbha jingmiat, bad ka jingroi ba shisha.
Ka vote jong phi ka lah ban pynphai biang ïa ka jingsarong bad ka lawei jong ka Assam. Nga kyntu khamtam ïa ki nongthep vote ba nyngkong eh ban mih bad thep vote na ka bynta ka jingïatylli bad ka jingkiew shaphrang.”
La pyntreikam ïa ka Webcasting ha baroh ki 31,490 tylli ki jaka thep vote. La buh ïa ki bor pulit jong ka Central Armed Police ban peit ïa ka jingpahara ha ki jaka thep vote.
Ki nongpeitkai ba rit ba ria kin peit ïa ka jingthep vote ha ki jaka ba kham ap jingma. Ki la don baroh kumba 1,51,132 ngut ki shipai ïada kiba la shah pyntreikam ha ki jaka thep vote.
Ka Bharatiya Janata Party (BJP) kaba la synshar naduh u snem 2016, ka dang wad ïa ka jingsynshar kaba lai sien lynter.
Ka Congress ka don ka jingkyrmen ban wanphai biang ha ka bor da kaba ïatreilang bad ki san tylli ki seng. Ka BJP ka ïakhun ha ki 90 tylli ki seat. Ki seng ba la ïatreilang bad ka, ka Asom Gana Parishad bad ka Bodoland Peoples Party, ki la pynïeng kyrtong na ki 26 bad 11 ngut. Ka Congress ka ïakhun 99 tylli ki seat.
