Shillong, Ïaïong 09
U Bah Lambok Marngar, President ka Khasi Students’ Union (KSU) Sengkmie u la ong ba lada ka Sorkar ka kwah ban kiew ka Jylla ha ka ïohkam, kam dei pat ban pynjot ïa ka mei mariang kaba pynduh noh ïa ka lyer kaba khuid kaba suba lane ki tyllong um tyllong wah.
U la ong ka jingwan ki kompeni kiba nabar ka seng ka ju pyrshah namar ki shu wan ban pynjot hynrei la ïohi ba ki samla trai Jylla ki shu ïeng tang ban ap khyrdop.
U la pynphai nia ruh ïa ka jingkren u Myntri Rangbah ka Jylla u Conrad Sangma ba kam don kata ka jingtei ïa katei ka jaka hynrei hadien ba la dep ban ïakren bad ki nongïalam ka Green-Tech Foundation, u sngewthuh kane ka jingïakhih jong ki kadei hadien ba ki la da wad bniah bad kam dei shuh ba ki dang shu rai.
U la ong ba kane ka jingïasoi ka dei naduh mynshem snem hynrei balei ka Sorkar ka aiti sha ki kompeni khlem da ïamir jingmut lang.
Kane ka jingpynpaw u Bah Lambok ka dei haba ka Khasi Students’ Union Sengkmie ha ka janmiet ki la leit sha madan Malki ban ai ka jingkyrshan ïa ki nongïalam ka Green-Tech Foundation kaba ki la shim ïa ka sienjam ban pynlong da ka jingïakhih shong shah thngan khlem buh por kaba la sdang ha ka sngi Palei naduh nakhmat Secretariat ban dawa na ka Sorkar ban weng shisyndon ban ïateh kontrak bad ki kompeni heh spah kiba nabar ban tei ïa ki jingtei ba heh ha ka dewlynnong Lumpongdeng ha Umiam.
