Shillong, Ïaïong 09
Ka Donita Elite Warrior Martial Arts Gym (DEWMAG) ka la long ka lahduh ha ka 5th East Khasi Hills District Wushu Championship 2026 ba la pynlong da ka East Khasi Hills District Wushu Association (EKHDWA).
Kane ka lympung ka la poi sha kaba kut ha ka 6 tarik mynta u bnai ha Laitkyrhong Sports Hall ha kaba ïa ka kyrdan ba-ar la ïoh da ka Stay Strong Fitness School (SSFC) bad balai ka Madanryting Martial Arts Physical Fitness Club (MMAPFC).
Ha kane ka lympung la wan ïashim bynta da kumba 150 ki nongïalehkai kiba la mihkhmat na ki klob bad ki shlem ai jinghikai bapaher bapher jong kane ka district kiba kynthup ïa ka Donita Elite Warrior Martial Arts Gym (DEWMAG), Stay Strong Fitness School (SSFC), Lamphrang Combat Academy (Smit), Madanryting Martial Arts Physical Fitness Club (MMAPFC) bad ka H. Elas School (Nongthym-mai) nalor ka Tribal Combat Academy (TCA)
Ïa ka nam Best Player ha ka Sanda la khur da u Wankitboklang Kharkongor, katba ha ka Taolu la ïoh da u Kyrshanbor R. Songthiang. U Kyrshanbor u la shah jied ruh ban mihkhmat ïa ka ri India sha ka lympung ïalehkai Wushu ka ban long ha Moscow, Russia.
Ha katei ka sngi pynkut la ïadon lang u Bah B. Mylliem, President ka synjuk bad u Bah R. Rynjah, Secretary ka Laitkyrhong Sports Club nalor kiwei pat. Katba ha ka sngi plie ïa kane ka lympung la ïadon lang u Bah Donny R. Ranee, President ka Meghalaya Wushu Association bad EKHDWA bad kiwei.
Na ka liang ka EKHDWA ka la ai khublei ïa baroh ki nongïashim bynta halor ka jinglah ban pynpaw ïa ki sap ïalehkai jong ki.
